سەرۆکوەزیران بارزانی: بەشێکی لایەنەکان ئاستەنگ بۆ ڕووبەڕووبوونەوەی گەندەڵی دروست دەکەن

ئاڤا نیوز

 

سەرۆکوەزیران بارزانی، لە جاڕدانی یەکەم ڕاپۆرتی جێبەجێکردنی ستراتیژیی ڕووبەڕووبوونەوەی گەندەڵی ڕایگەیاند: بەشێک لە لایەنەکان نەوەک هاوکار نەبوون بۆ ڕووبەڕووبونەوەی گەندەڵی، بەڵکو ئاستەنگیشیان دروست کردووە.

وێنە گەورەکە: بەگوتەی دەستەی دەستپاکیی هەرێمی کوردستان، عێراق لەڕیزبەندی 25-ەمی وڵاتانی گەندەڵە لەسەر ئاستی جیهان، بۆیە هەرێمی کوردستان دەیەوێت ستراتیژیەتی ڕووبەڕووبونەوەی گەندەڵی دابڕێژێت.

لێدوانی فەرمی: سەرۆکوەزیران بارزانی لە جاڕدانی یەکەم ڕاپۆرتی جێبەجێکردنی ستراتیژیی ڕووبەڕووبوونەوەی گەندەڵی لە کەرتی گشتی کە ئەمڕۆ لە شاری هەولێر بەڕێوەچوو، ڕایگەیاند: "پێویستە سەرجەم دامەزراوەکان کار لەسەر بڵاوکردنەوەی کولتووری دەستپاکی بکەن، ڕووبەڕووبونەوەی گەندەڵی بەشێکی گرنگ بووە لە ستراتیژیەتی کابینەی نۆیەم، بە بانکیکردن و بە دیجیتاڵیکردنی کاروبارەکانی حکومەت بەشێک بووە لە ستراتیژیەتی ڕووبەڕووبونەوەی گەندەڵی".

لەلایەکی دیکەوە: سەرۆکوەزیران بارزانی بە ئاماژەدان بەوەی لە چەند ساڵی ڕابردوودا لێکۆڵینەوە لە چەندین کەیسی گەندەڵی لە هەرێمی کوردستان کراوە، ڕایگەیاند: "بەشێک لە لایەنە سیاسییەکان نەک کارئاسانییان نەکردووە بۆ ڕووبەڕووبونەوەی گەندەڵی، بەڵکو ئاستەنگیان دروستکردووە".

باکگراوند: لە مانگی نۆی ساڵی 2021 ئەنجوومەنی وەزیرانی هەرێمی کوردستان ستراتیژیەتی ڕووبەڕوونەوەی گەندەڵی پەسەند کردووە.