فراکسیۆنە کوردستانییەکان: ماف بۆ جووتیارانی ناوچە کوردستانییەکان بگەڕێنرێتەوە

ئاڤا نیوز 

فراکسیۆنە کوردستانییەکان لە پەرلەمانی عێراق نیگەرانن لە دواخستنی دەنگدان لەسەر پڕۆژەیاسایەک کە بەهۆیەوە ماف بۆ خاوەن زەوییە کشتوکاڵییەکانی جووتیارانی کورد لە ناوچە کوردستانییەکانی دەرەوەی هەرێمی کوردستان دەگەڕێنێتەوە، داواش دەکەن بەخێرایی دەنگ لەسەر پڕۆژەکە بدرێت.

وێنە گەورەکە: پەرلەمانی عێراق لە کۆبوونەوەی ڕۆژی سێشەممەیدا و لەسەر داوای دوو پەرلەمانتاری پێکهاتەی عەرەب، دەنگدانی لەسەر پڕۆژەیاسای "گەڕاندنەوەی موڵکەکان بۆ خاوەنەکانیان کە بەهۆی بەشێک لە بڕیارەکانی ئەنجوومەنی سەرکردایەتیی شۆڕشی هەڵوەشاوە {حکومەتی بەعس} لێیان زەوتکراوە" بۆ کاتێکی نادیار دواخست، ئەوەش ناڕەزایی  فراکسیۆنە کوردستانییەکانی لێکەوتەوە.

ڕاگەیێنراوی فەرمی: فراکسیۆنەکانی پارتی، یەکێتی، نەوەی نوێ، یەکگرتوو، کۆمەڵ و  فاروق حنا عتو، پەرلەمانتاری مەسیحی لە پەرلەمانی عێراق، لە ڕاگەیێنراوێکی هاوبەشدا ئاماژە بەوە دەکەن، دواخستنی دەنگدان لەسەر ئەو پڕۆژەیاسایە جێگەی نیگەرانییە، چونکە بەهۆیەوە ئەو ستەمە لەسەر هاووڵاتیان هەڵدەگیرێت کە ڕژێمی پێشوو بەرامبەریان کردوویەتی، بۆیە داوا دەکەن "هاوبەشەکانمان لە نیشتیمان پشتیوانی بەدیهێنانی دادپەروەری بن و دەنگ بە پڕۆژەیاساکە بدەن".

لەلایەکی دیکە: هاوپەیمانی عروبە کە وەسفی عاسی، نوێنەری پارێزگای کەرکووک لە ئەندامی پەرلەمانی عێراق سەرۆکایەتی دەکات ڕایگەیاند، ڕەشنووسی یاساکە بەو شێوازەی ئێستا کاریگەری خراپی لەسەر بەشێک لە جووتیاران دەبێت و ئاشتی کۆمەڵایەتی دەخاتە مەترسییەوە، بۆیە بۆ گفتوگۆی زیاتر داوای کردووە دەنگدان لەسەر پڕۆژە یاساکە دوابخرێت.