لە قەزا و ناحییەکانی پارێزگای دهۆک زەوی بۆ فەرمانبەران دەستنیشان کراوە

ئاڤا نیوز

 

لە بەشێکی زۆری قەزا و ناحییەکانی پارێزگای دهۆک زەوی بۆ دابەشکردن بەسەر فەرمانبەران دەستنیشان کراوە و ئامادەکارییەکانیش بۆ دەستپێکردنی ئەو پرۆسەیە لە قۆناغی باشی بڕیوە.

 

وێنە گەورەکە: دوای 18 ساڵ لە وەستانی، ڕۆژی 27-03-2024 سەرۆکوەزیران بارزانی لە کۆبوونەوەی ئەنجوومەنی وەزیران بڕیاری دابەشکردنی زەوی بەسەر فەرمانبەران ڕاگەیاند.

 

لێدوانی فەرمی: دیار بەحری، بەڕێوەبەری گشتیی شارەوانییەکانی پارێزگای دهۆک بە ئاڤا نیوزی ڕاگەیاند، هەنگاوەکان بۆ دابەشکردنی زەوی بەسەر فەرمانبەران قۆناغی باشی تێپەڕاندووە و لەماوەیەکی نزیکدا ئامادەکارییەکان کۆتایی دێن و بەدڵنیاییەوە فەرمانبەران سوودمەند دەبن لە وەرگرتنی زەوی.

 

زانیاریی زیاتر: لە بەشێکی زۆری قەزا و ناحییەکانی سەر بە پارێزگای دهۆک زەوی دەستنیشان کراوە بۆ دابەشکردن، ئێستا لەلایەن لیژنەکانەوە کار لەسەر ڕێکارە یاساییەکان دەکرێت بۆ ئەوەی ئامادە بکرێن.

 

گۆشەیەکی دیکە: پێش چەندین ساڵ 21 هەزار کەس لە پارێزگای دهۆک فەرمانی پێدانی زەویان بۆ دەرچووە، بەپێی قسەی بەڕێوەبەری گشتیی شارەوانییەکان، ئێستا ئامادەکاری بۆ ئەوانیش کراوە کە زەوی بەوانەش بدرێت.

 

لەلایەکی دیکەوە: پێشتر سەربەست مەولوود، بەڕێوەبەری گشتیی کاروباری یاسایی لە وەزارەتی شارەوانی و گەشتوگوزار بە ئاڤا نیوزی گوت: تاوەکو ئێستا پرۆسەی کارکردن لەسەر فۆڕمی وەرگرتنی زەویی فەرمانبەران و مامۆستایان بەردەوامی هەیە، وەزارەتەکان ئاگادار کراونەتەوە، بەر لە 18-09-2024 فۆڕمەکان بگەیێننە ئەنجوومەنی وەزیران.