عێراق و هەرێمی کوردستان یاداشتێکی هاوبەش لەبارەی گەندەڵی واژۆ دەکەن

ئاڤا نیوز

دەستەی دەستپاکیی عێراق و دەستەی دەستپاکیی هەرێمی کوردستان بەمزووانە یاداشتێکی هاوبەش بۆ بەرەنگاربوونەوەی گەندەڵی  واژۆ دەکەن.

وێنە گەورەکە: ئەمڕۆ 4ی ئەیلوولی 2024 لە هەولێر، یەکەم جاڕدانی ڕاپۆرتی جێبەجێکردنی ستراتیژیی ڕووبەڕووبوونەوەی گەندەڵی لە کەرتی گشتی بە ئامادەبوونی سەرۆکوەزیران بارازنی لەلایەن دەستەی دەستپاکی هەرێمی کوردستان ڕێکخرا.

لێدوانی فەرمی: حەیدەر حەنوون، سەرۆکی دەستەی دەستپاکیی عێراق لە میانەی کۆنفرانسەکەدا ڕایگەیاند: خولی ڕاهێنان و وۆرکشۆپ بۆ تیمەکانی ستراتیژیەتی بەرەنگاربوونەوەی گەندەڵی لە دەستەی دەستپاکی و وەزارەتەکان لە عێراق و هەرێمی کوردستان بە هاوکاری ڕاهێنەر و شارەزایانی وڵاتی میسر دەکرێنەوە.

ئەوەی پێویستە بیزانیت: وەک حەیدەر حەنوون ئاماژەی پێدا، هەردوو دەستەی دەستپاکی عێراق و هەرێمی کوردستان لێکتێگەیشتنێکی هاوبەش لەمبارەیەوە واژۆ دەکەن، خولەکانیش بە هاوکاریی ڕاهێنەر و شارەزایانی وڵاتی میسر دەکرێنەوە. 

لەلایەکی دیکەوە:  عێراق لە ئایندەیەکی نزیکدا ستراتیژیەتی بەرەنگاربوونەوەی گەندەڵی بۆ ماوەی ساڵەکانی 2025 تاوەکو 2030 بە یارمەتی سەرۆکایەتیی کۆمار و حکومەت و پەرلەمان، لەگەڵ دیوانی چاودێریی دارایی عێراق، دەستەی دەستپاکیی هەرێمی کوردستان و ڕێکخراوەکانی کۆمەڵگەی مەدەنی ڕادەگەیێنێت.

گۆشەیەکی دیکە:  دەستەی دەستپاکیی عێراق هەر ئەمڕۆ لە هەولێر کۆنفرانسێکی ڕۆژنامەوانی لەبارەی ڕووبەڕووبوونەوەی گەندەڵی ڕێکدەخات.   حەیدەر حەنوون دەڵێت: "کۆنفرانسەکە گرنگ، شۆککەر و شەرمەزارکەر دەبێت و تایبەتە بە دۆسیەی دزیی سەدە و گرێبەستەکانی بەندەری فاو".