وەرگرتنی مامەڵەی زەویی سندووقی درێژکرایەوە

ئاڤا نیوز 

 

لە هەولێر ڕێگەپێدانی زەویی سندووقی بۆ  100 هاونیشتمانی تەواو کرا و وەرگرتنی مامەڵەش لە هاونیشتمانیان بۆ سێ مانگی دیکە درێژ کرایەوە.

 

وێنە گەورەکە: بۆ کەمکردنەوەی کێشەی نیشتەجێبوون لە سنووری هەولێر و دەوروبەریدا، لە ساڵی ڕابردووەوە تاوەکو ئێستا زیاتر لە پێنج هەزار ڕێگەپێدانی نۆژەنکردنەوەی ئەو خانووانەی لەسەر زەویی زێدەڕۆ دروست کراون، زەویی سندووقی و گوند بە هاونیشتمانیان دراوە.

 

چیرۆکی سەرەکی: ئەمڕۆ لە هەولێر 100 هاونیشتمانی دیکە ڕێگەپێدانی دروستکردنی خانوو لەسەر زەوی سندووقیان پێدرا.

 

لێدوانی فەرمی: ئومێد خۆشناو، پارێزگاری هەولێر بە ئاڤا نیوزی گوت: وەرگرتنی مامەڵەی دروستکردنی خانوو لەسەر زەویی سندووقی و ناو گوند کە لە 01/09/2024 تەواو دەبوو درێژکرایەوە بۆ 01/12/2024 بۆ ئەوەی زۆرترین هاونیشتمانی سوودمەندبن.

 

بۆچی گرنگە: ئەو هاونیشتمانیانەی ڕێگەپێدانیان پێدەدرێت دەتوانن دەست بە دروستکردنی خانوو بکەن یان خانووەکانیان نۆژەن بکەنەوە بۆ ئەم مەبەستەش دامودەزگا پەیوەندیدارەکان ڕاسپێردراون ئاسانکارییان بۆ بکەن.

 

ژمارەکان وادەلێن: لە ساڵی ڕابردووەوە تاوەکو ئێستا دوو هەزار و 292 هاونیشتمانی ڕێگەپێدانی دروستکردنی خانوو لەسەر زەوی سندووقییان پێدراوە، 539 خانووی زێدەڕۆ ڕێگەپێدانی نۆژەنکردنەوەیان بۆ کراوە، 2438 هاونیشتمانیش ڕێگەپێدانیان بۆ کراوە لە گوند خانوو دروست بکەن.