سەرۆکوەزیران بارزانی: هەرێمی کوردستان باجی سیاسەتی ناتەندروستی هەندێک کەس دەدات

ئاڤا نیوز

 

سەرۆکوەزیران بارزانی ڕایدەگەیێنێ، هەرێمی کوردستان لەو داهاتە زۆر و زەوەندی عێراق سوودمەند نییە و، باجی سیاسەتی هەڵەی کۆمەڵێک کەس دەدات کە بەرامبەر هەرێمی کوردستان گیراوەتە بەر.

وێنە گەورەکە: ئەمڕۆ چوارشەممە بە ئامادەبوونی سەرۆکوەزیران بارزانی ڕێورەسمی ڕێزلێنان لە 70 وەبەرهێنەر لە شاری هەولێر بەڕێوەچوو.

لێدوانی فەرمی: سەرۆکوەزیران بارزانی لە مەراسیمەکەدا گوتارێکی پێشکەش کرد و ڕایگەیاند: "ئەم خەڵاتە بۆ هەموو ئەو وەبەرهێنەرانەیە کە خزمەتی خەڵکی کوردستانیان کردووە، پێزانینی ئێمەیە لەپای ئەو خزمەتەی کردووتانە".

 سەرۆکوەزیران ئاماژەی بۆ ئەوە کرد حکومەت بە هاوکاری وەبەرهێنەران ئاستەنگ و قەیرانەکانی تێپەڕاندووە، لەپای ئەوەش سوپاسی کردن و گوتی: "سوپاستان دەکەم کە ڕۆڵتان هەبووە لە یارمەتیدانی حکومەت و ڕۆڵی کاریگەرتان هەبووە لە خزمەتکردنی هاونیشتمانیان، بەبێ ئێوە ئەو هەموو پڕۆژەیە نەدەکرا، ئامانجمان دروستکردنی ژێرخانێکی ئابووریی بەهێزە".

لەلایەکی دیکەوە: سەرۆکوەزیران بارزانی ئاماژەی بە وێنە گەورەکەی کەرتی ئابووری لە عێراق کرد و پەیوەست بە گەلی کوردستان گوتی: "هەرێمی کوردستان لەو داهاتە زۆر و زەوەندی عێراق سوودمەند نییە، باجی سیاسەتی هەڵەی کۆمەڵێک کەس دەدات کە بەرامبەر هەرێمی کوردستان گیراوەتەبەر، ئێمە هەرگیز کۆڵنادەین، بەردەوام دەبین لە خزمەتی خەڵک".

باکگراوند: لەماوەی پێنج ساڵی ڕابردوودا لە کابینەی نۆیەمی حکومەتی هەرێمی کوردستان، وەبەرهێنەران لەڕێگەی دەستەی وەبەرهێنان دەیان پڕۆژەیان لەسەر ئەرکی خۆیان دروست کردووە.