لە شارباژێر بە درۆن ئۆتۆمبێلێک دەکرێتە ئامانج و گیانلەدەستدان هەیە

ئاڤا نیوز 

 

 لە گوندی هەرمێلەی ناحیەی زەلان لە سنووری قەزای شارباژێری سنووری پارێزگای سلێمانی، ئۆتۆمبێلێک بە درۆن کرایە ئامانج و بەپێی زانیارییە سەرەتاییەکان سێ کەس گیانیان لەدەست داوە.

 

وێنە گەورەکە: ئەمساڵ سوپای تورکیا هێرشی بۆ سەر گەریلاکانی پەکەکە چڕکردووەتەوە و بۆردوومانەکان بەشێوەیەکی بەرچاو زیادیان کردووە."بەتۆمەتی هەبوونی پەیوەندی لەگەڵ پەکەکە"ش ناوەناوە ئۆتۆمبێل بەتایبەت لە سنووری سلێمانی دەکاتە ئامانج کە ئەندامانی پەکەکە تێیدا چالاکن، لە ماوەی 13 ڕۆژی ڕابردووشدا ئەوە سێیەم ئۆتۆمبێلە بکرێتە ئامانج و بەهۆیەوە 8 کەس گیانیان لەدەست داوە.

چیرۆکی سەرەکی: دوانیوەڕۆی ئەمڕۆ پێنجشەممە دروست 24 کاتژمێر دوای بۆردوومانکردنی ئۆتۆمبێلەکەی سنووری قەزای دووکان، جارێکی دیکە ئۆتۆمبێلێک لە جۆری پیکاب ژمارە سلێمانی لە گوندی باسنێی ناحیەی زەلان لە سنووری پارێزگای سلێمانی بە درۆن کرایە ئامانج.

 

زایاریی بەدەستهاتوو: ژیوار عەبدولڕەحمان، پەیامنێری ئاڤا نیوز لە سلێمانی ڕایگەیاند: بەپێی زانیارییە سەرەتاییەکان سێ کەس گیانیان لەدەست داوە و تەرمی قوربانییەکان بەرەو پزیشکی دادی سلێمانی ڕاوانە کراوە.

بەگوتەی پەیامنێری ئاڤا نیوز، یەکێک لە قوربانییەکان منداڵە، یەکێکیشان پیاوە و خەڵکی گوندی چەمەکانی سەر بە قەزای شارباژێرە، یەکێکیشیان بەهۆی زۆری ڕێژەی سووتانەوە نەناسراوەتەوە.

ئەمەش بزانە: تاوەکو ئێستا تورکیا بۆردوومانەکەی ئەمڕۆی شارباژێر و بۆردوومانەکەی دوێنێی دووکانی پشتڕاست نەکردووەتەوە، بەڵام لەبارەی بۆردوومانەکەی ڕۆژی 23ی مانگی ڕابردووی سنووری قەزای سەیدسادق کە دوو ژنە ڕۆژنامەڤان گیانیان لەدەست دا و کەسێکی دیکەش بریندار بوو، میدیاکانی تورکیا لەزاری سەرچاوەیەکی هەواڵگرییەوە ڕایانگەیاند، یەکێک لەو ژنانەی کوژرا سەرکردەی پەکەکە بووە.