گەورەترین کۆنفرانسی بواری ئاسایش لە میونشن دەستپێدەکات

ئاڤا نیوز

بە بەشداریی دەیان سەرۆک و سەرکردە و سەدان کەسایەتیی جیهانی، ئەمڕۆ هەینی 60ەمین کۆنفڕانسی ئاسایشی مینوشن دەستپێدەکات و سێ ڕۆژ دەخایەنێت.

وێنە گەورەکە: ئەگەر داڤۆس گەورەترین کوڕبەندیی ئابووریی جیهان بێت، ئەوا میونشن لە بواری ئاسایش گەورەترینە و، سەکۆیەکە بۆ گفتوگۆکردن لەسەر سیاسەتی ئاسایشی نێودەوڵەتی.

کێ بەشدارە: هەریەک لە نێچیرڤان بارزانی، سەرۆکی هەرێمی کوردستان، محەمەد شیاع سوودانی، سەرۆکوەزیرانی عێراق و بافڵ تاڵەبانی، سەرۆکی یەکێتیی نیشتمانیی کوردستان لە  کۆنفڕانسی میونشن 2024 بەشدارن.

بابەتە ستراتیژییەکان: تەوەرە گرنگەکان بریتین لە: ئاڵنگارییەکانی ئاسایشی جیهانی، زیرەکیی دەستکرد، سیستەمی جیهانی و ریفۆرمی ئەنجوومەنی ئاسایشی نەتەوەیەکگرتووەکان، پێگە و ڕۆڵی ئەمریکا و چین لە جیهاندا، تووندوتیژیی سێکسی لە ململانێ چەکدراییەکاندا، پاراستنی یاسای مرۆیی نێودەوڵەتی، ئاسایشی ئاو و گۆڕانی کەشوهەوا، جەنگی ئۆکراینا و شەڕی غەززە. 

بۆچی گرنگە: چاوەڕێ دەکرێت نێچیرڤان بارزانی لەگەڵ ژمارەیەک سەرکردە و کەسایەتییە جیهانییەکان کۆببێتەوە. کۆنفرانسەکە لەکاتێکدایە هەرێمی کوردستان دوای هەڵگیرسانی شەڕی غەززە ڕووبەڕووی دەیان هێرشی ئێران و میلیشیا شیعەکانی عێراق بووەتەوە.