وەزارەتی دەرەوەی عێراق: لەگەڵ هەولێر هەوڵی گەیشتن بە چارەسەر دەدەین

ئاڤا نیوز 

وەزارەتی دەرەوەی عێراق لەبارەی دەستپێکردنی کۆبوونەوەی نێوان هەرددوو ئەنجوومەنی ئابووریی  هەرێمی کوردستان و عێراق ڕاگەیێنراوێکی بڵاوکردەوە و ڕایگەیاند، پرسە دارایی و ئابوورییەکان تەوەرەی سەرەکی دەبن و لەگەڵ هەرێمی کوردستان بەدوای چارەسەرێکی سەرکەوتوو دەگەڕێن.

وێنە گەورەکە: ماوەی چەند ساڵێکە چەندین پرس لەنێوان هەرێمی کوردستان و عێراق بە هەڵپەسێردراوی ماونەتەوە، ئێستا شاندێکی ئابووریی عێراق لە هەولێرە و بڕیارە تاوەکو سبەی ئێوارە زنجیرەیەک کۆبوونەوە بکەن و چەندین گرفت یەکلایی بکرێنەوە.

ڕاگەیێنراوی فەرمی: وەزارەتی دەرەوەی عێراق ڕایگەیاند: ئامانجی کۆبوونەوەکەی ئەمڕۆ یەکشەممە بۆ گەیشتنە بە لەیەکگەیشتن لەنێوان حکومەتی فیدراڵی و حکومەتی هەرێمی کوردستان سەبارەت بەو بابەتانەی کێشەیان لەسەرە، بەتایبەت ئەو دۆسیانەی پەیوەندییان بە پرسی دارایی و ئابووری هەیە.

زانیاریی زیاتر: دانیشتنەکان دوو ڕۆژ بەردەوام دەبن، لە ڕاگەیێنراوەکەدا ئاماژە بەوە دراوە، چەندین کۆبوونەوەی هونەری دیاریکراو و تایبەتمەند بەڕێوەدەچن بۆ یەکخستنی بۆچوونە جیاوازەکان بۆ گەیشتن بە چارەسەرێکی سەرکەوتوو.

ئەوەی پێویستە بیزانیت: شاندی ئەنجوومەنی وەزاریی ئابووریی عێراق بەسەرۆکایەتیی د.فواد حوسێن، سەرۆکی ئەنجوومەنەکە کە هاوکات وەزیری دەرەوەی عێراقە، پێکهاتووە لە:

- محەممەد عەلی تەمیم، جێگری سەرۆکوەزیران و وەزیری پلاندانانی عێراق.

- تەیف سامی، وەزیری دارایی عێراق.

- عەلی عەللاق، پارێزگاری بانکی ناوەندیی.

- حەمید نەعیم، ئەمینداری گشتیی ئەنجوومەنی وەزیرانی عێراق.

- ئەسیر داود غورەیری، وەزیری بازرگانیی عێراق.

- ئەحمەد جاسم، وەزیری کار و کاروباری کۆمەڵایەتیی عێراق.

فەیسەڵ وسام، سەرۆکی دەستەی کاغەزە داراییەکانی عێراق.

عەلی مەعارج، بریکاری وەزارەتی نەوتی عێراق.

ئەحمەد عەبدولجەبار، بریکاری وەزارەتی پیشەسازی و کانزاکان.

عەباس نەسروڵڵا، سکرتێری ئەنجوومەنی وەزاری بۆ کاروباری ئابووریی عێراق.

 میساق عەبدولحوسێن، بریکاری تەکنیکی وەزارەتی کشتوکاڵی عێراق.