" حەماس و عەباس لە پلانی داهاتووی غەززەدا نین"

ئاڤا دیجیتاڵ

شەش وڵاتی عەرەبی پلانێکی نوێ بۆ داهاتووی فەڵەستین دادەنێن. بەپێی پلانەکە مەحموود عەباس و بزووتنەوەی حەماس پەراوێز دەخرێن و بەرپرسیارێتی دەدرێتە سەرکردەیەکی نوێ.

زانیاری نهێنی: محەممەد دەحلان، ڕاوێژکاری پێشووی مەحموود عەباس، سەرۆکی دەسەڵاتدارێتی فەڵەستین، لە چاوپێکەوتنێکدا لەگەڵ ڕۆژنامەی نیویۆرک تایمزی ئەمریکی، زانیاری نهێنی لەبارەی داهاتووی غەززە و چۆنیەتی بەڕێوەبردنی دوای وەستانی شەڕ ئاشکرا کردووە.

چیرۆکی سەرەکی: شەش بەرپرسی وڵاتانی عەرەبی هەفتەی ڕابردوو لە سعوودیە کۆبوونەتەوە بۆ پلاندانان و گفتوگۆکردن لەبارەی داهاتووی غەززە و پێویستی ڕاگرتنی شەڕ لە نێوان ئیسرائیل و حەماسدا.

پلانەکە بەمشێوەیە: سەرکردەیەکی نوێی فەڵەستینی بەرپرسیاریێتی بەڕێوەبردنی غەززە و بەشێک لە کەرتی ڕۆژئاوا دەگرێتە ئەستۆ، کە ئیسرائیل دەستی بەسەرداگرتووە و ئێستا دەسەڵاتداریێتی فەڵەستین بەڕێوەی دەبات. 

ئەو سەرکردە فەڵەستینییە جێگەی مەحموود عەباسی تەمەن 88 ساڵ دەگرێتەوە و ناوبراو ڕۆڵی تەشریفاتی دەبێت. بەڵام بەگشتی نە حەماس و نە عەباس ڕۆڵی بەڕێوەبردنیان پێنادرێت و کەسانی نوێ دەبنە بەرپرس لە دەسەڵاتدارێتی فەڵەستین.

هەنگاوی داهاتوو: بەڕێوبەرایەتیی نوێی دەسەڵاتدارێتی فەڵەستین دەکرێت داوا لە وڵاتانی عەرەبی دۆست بکات هێز ڕەوانە بکەن بۆ پاراستنی سیستمەکە لە غەززە.

خاڵە ئەرێنییەکان: وڵاتانی وەکو ئیمارات و سعوودیە ئامادەن بۆ هاوکاریکردن و دووبارە بونیاتنانەوەی شارەکە ئەگەر هاتوو ئیسرائیل ڕەزامەندی نیشاندا بە دامەزراندنی دەوڵەتی فەڵەستین.