خەرجی پاککردنەوەی کێڵگە مینڕێژکراوەکان ساڵانە ملیاران دینارە

ئاڤا نیوز 

 

لەسەرەتا دروستبوونی شۆڕشە ڕزگاریخوازەکان لە هەرێمی کوردستان تاوەکو هاتنی ڕێکخراوی تیرۆریستی داعش بۆ عێراق، زیاتر لە 750 ملیۆن مەتر دووجا لە خاکی هەرێمی کوردستان مینڕێژکراوە.

 

لێدوانی فەرمی: نیازی خالید، جێگری سەرۆکی دەزگای مین بە ئاڤا نیوزی ڕاگەیاند: بەپێی ڕووپێوی ڕێکخراوێکی جیهانی، زیاتر لە 750 کیلۆمەتری دووجا وەکو ناوچەی پیسبوو لە هەرێمی کوردستان دەستنیشانکردووە، لە ماوەی سی ساڵی ڕابردووشدا زیاتر لە 520 کیلۆمەتری دووجا پاککراوەتەوە، تا ئێستا زیاتر لە 200 کیلۆمەتری چێنراو بە مین لە هەرێمی کوردستان ماوە.

 

ژمارەکان وادەڵێن: زیاتر لە سیانزە هەزار و 500 کەس بوونەتە قوربانی مینەچێنراوەکان کە زۆرینەیان هاووڵاتی مەدەنین، 5 هەزار لەوانە منداڵن، هەر بەپێی ئەو ئامارە، لە ساڵی 1992 تاوەکو ئێستا 36 کارمەندی دەزگای مین گیانیان لەدەستداوە وە 78 کارمەندیش کەمئەندام بوون.

 

ئامارە فەرمییەکان: کابینەی نۆیەمی حکومەتی هەرێمی کوردستان ساڵانە بڕی 750 ملیۆن دینار، پێشکەش بە دەزگای مینی هەریمی کوردستان دەکات بە مەبەستی دابینکارییە لۆجستیەکان، هاوکات لە کۆتاییەکانی ساڵی 2023 دا، نزیکەی سێ ملیار و هەشت ملیۆن دینار بۆ پاککردنەوەی سنووری سلێمانی تەرخانکراوە.

 

ئەوەی پێویستە بیزانیت: دابەشبوونی ناوچە بە مین ڕێژکراوەکان بەم شێوازە خوارەوەیە: 
 
شارباژێر: لە سنووری سلێمانی زۆرترین مین چێنراوە، کە ڕووبەرەکەی 36 ملیۆن مەتر دووجایە، دواتر ناوچەکانی پێنجوێن و سۆران و چۆمان و هەڵەبجە دێن.

 

ئامێدی: لە سنووری پارێزگای دهۆک، زۆرترین مینی چێنراوی لەسەر ئاستی پارێزگاکە تێدایە، کە نزیکەی 10 ملیۆن مەتری دووجایە. 

خاڵە نەرێنییەکان: ئەو ناوچانەی لە هەرێمی کوردستان مینڕێژکراون بوونەتە ڕێگری لەبەردەم ئاوەدانکرنەوەیان لەلایەن حکومەتی هەرێمی کوردستان، لەبەرامبەردا ساڵانە بوودجەی تایبەت بۆ پاککردنەوەی ئەو ناوچانە تەرخان دەکرێت.