خێزانی بازرگانە کوژراوەکەی دهۆک لەگەڵ جێگری وەزیری دادی تورکیا کۆبوونەوە

ئاڤا نیوز

 

 

دوای کۆبوونەوەی سەرۆکوەزیران بارزانی لەگەڵ ئەنیڵ بۆڕا ئینان، باڵیۆزی تورکیا لە عێراق، تورکیا بۆ پرسی کوژرانی بازرگانە کوردەکەی دهۆک هاتە سەر خەت و لەگەڵ خێزانەکەیدا کۆبوونەوە.

 

بۆچی گرنگە: ئەم کۆبوونەوەیە لە چوارچێوەی گرنگیدانە بە پاراستنی ئاسایشی گەشتیارانی کورد لە تورکیا، ئەمەش دوای ئەوەی باڵیۆزی تورکیا لە کۆبوونەوەکەی لەگەڵ سەرۆکوەزیران بارزانی، دڵنیایی دا لە سەلامەتی گەشتیارانی کورد و جەختی لەوە کردەوە لایەنە پەیوەندیدارەکانی تورکیا لێکۆڵینەوە لە ڕووداوەکە دەکەن.

 

زانیاریی تایبەت: ئاڤا زانیویەتی، خانەوادەی حەکیم لوقمان لەلایەن خورشید یڵدرم، جێگری وەزیری دادی تورکیاوە بانگهێشتی ئەنقەرە کراون، کۆبوونەوەی لەگەڵیان کردووە و سەرۆکی دادگای ئیستەنبووڵی ڕاسپاردووە بۆ ئەوەی لێكۆڵینەوەی ورد لە ڕووداوەکە بکەن و تۆمەتباران بدرێنە دادگا. 

 

ئەمەش بزانە: خێزانەکەی حەکیم هۆکاری کوشتنی کوڕەکەیان بۆ قسەکردن بە زمانی کوردە گەڕاندوە، تورکیاش ئەوەی ڕەتدەکاتەوە. 

 

باکگراوند: حەکیم لوقمان، بازرگانێکی کوردی خەڵکی شاری دهۆکە، لە ڕۆژی  31-8-2024 لە شاری ئیستەنبووڵی تورکیا لەلایەن چەند کەسێکەوە کوژرا.