سەرۆکوەزیران بارزانی: شۆڕشی ئەیلوول ئیلهامبەخشی کارەکانمە بۆ زیاتر خزمەتکردن

ئاڤا نیوز 

 

سەرۆکوەزیران بارزانی لە یادی شۆڕشی ئەیلوول دەڵێت: "هەمیشە ئیلهامبەخشی کارکردنمانە لەپێناو خزمەتکردنی زیاتری خەڵکی کوردستان و پاراستنی دەستکەوتە نیشتمانییەکانمان".

 

وێنە گەورەکە: ئەمڕۆ 63 بەسەر هەڵگیرسانی شۆڕشی ئەیلوول تێدەپەڕێت کە شۆڕشێکی نیشتمانی و سەرتاسەری و هەمەلایەنی کوردستان بوو بەسەرکردایەتیی بارزانیی نەمر.

پەیامی فەرمی: سەرۆکوەزیران بارزانی لەو یادەدا دەڵێت: یادکردنەوەی شۆڕشی ئەیلوول، یادکردنەوەی قۆناغێکی گەشی خەباتی ڕزگاریخوازیی گەلی کوردستانە لەپێناو مافە ڕەواکانی و، کۆڵنەدانە لە داکۆکیکردن لە خاک و خەڵکی کوردستان. 

قووڵتر: بە ئاماژەکردن بە بەها بەرزەکانی شۆڕشی ئەیلوول لە چەسپاندنی دادپەروەری و یەکڕیزی و یەکگرتوویی و وەستانەوە بەرامبەر ستەم و بێدادی، سەرۆکوەزیران بارزانی دەڵێت: "شۆڕشی ئەیلوول هەمیشە ئیلهامبەخشی کارکردنمانە لەپێناو خزمەتکردنی زیاتری خەڵکی کوردستان و پاراستنی دەسکەوتە نیشتمانییەکانمان".

لەلایەکی دیکەوە: سەرۆکوەزیران بارزانی  یادی خەبات و تێکۆشان و قوربانیدانی هەموو پێشمەرگە و تێکۆشەرە بەشدارەکانی شۆڕش لە هەموو چین و توێژ و پێکهاتە جیاوازەکانی گەلی کوردستان دەکاتەوە. هەروەها سڵاو دەنێرێت بۆ گیانی پاکی شەهیدانی شۆڕشی ئەیلوول و گشت شەهیدانی کوردستان.