سەرۆک بارزانی: شۆڕشی ئەیلوول ئیرادە و بڕوابەخۆبوونی بۆ مرۆڤی كورد گەڕاندەوە

ئاڤا نیوز

 

سەرۆک بارزانی لە شەست و سێیەمین ساڵیادی شۆڕشی ئەیلوول پەیامێکی بڵاوکردەوە و ڕایگەیاند،  شۆڕشی ئەیلوول  ئیرادە و بڕوابەخۆبوونی بۆ مرۆڤی كورد گەڕاندەوە.

 

وێنە گەورەکە: 63 ساڵ بەسەر شۆڕشی ئەیلوول بە ڕابەرایەتیی  بارزانیی نەمر تێدەپەڕێت کە گەورەترین شۆڕشی سەرتاسەری و سیاسی و چەكداریی جەماوەری كوردستان بوو بۆ بەرگریكردن و چەسپاندنی مافە ڕەواكانی گەلی كوردستان.

 

پەیامی فەرمی: سەرۆک بارزانی دەڵێت: شۆڕشی ئەیلوول ئیرادە و بڕوابەخۆبوونی بۆ مرۆڤی كورد گەڕاندەوە و بوو بە بنەمایەكی بەهێزی سیاسی و ڕێكخراوەیی و جەماوەری بۆ بەردەوامیی خەباتی ڕزگاریخوازی گەلی كوردستان لەدژی ستەم و داگیركاری.

 

لە پەیامەکەیدا سەرۆک بارزانی ئاماژەی بەوە داوە کە شۆڕشی ئەیلوول بە داستان و نەبەردییەكانییەوە و بە خۆڕاگریی سەركردایەتی و پێشمەرگە و جەماوەرەوە دۆزی ڕەوای گەلی كوردستانی  چەندین هەنگاو بەرەو پێشەوە برد و بووە ئیلهامبەخشی خەبات و تێكۆشان بۆ قۆناغەكانی دیکەی خەباتی گەلی كوردستان.

 

لەلایەکی دیکەوە: سەرۆک بارزانی هەزاران سڵاو بۆ گیانی پاكی شەهیدانی شۆڕشی ئەیلوول و هەموو شەهیدانی كوردستان دەنێرێت و دەڵێت: پێزانینم بۆ فیداكاری و ماندوونەناسیی هەموو ئەو پێشمەرگە و خەباتگێڕ و قارەمانانە هەیە كە شوێن پەنجەیان لەو شانازییە نیشتیمانییەدا دیارە، ئەو قارەمانانە مێژوویان بۆ گەلەكەیان تۆمار كردووە و ژیان و خەباتی هەركامەیان وانەی خەبات و خۆڕاگرییە.