"ئامانجی سەرەكی سەردانی پزیشكیان بۆ لابردنی سنووری نێوان عێراق و ئێرانە"

ئاڤا نیوز

بەگوتەی پەرلەمانتارێکی ئێران، وڵاتەکەی نیازی هەیە سنووری خۆی لەگەڵ عێڕاق نەهێڵێت، تا ئاسانتر دەستی بە سووریا و لوبنان بگات، ئەمەش ئەجێندای سەرەکیی سەردانی مەسعود پزیشکیانە بۆ عێراق.

چیرۆكی سەرەكی: لیژنەی ئاسایشی نەتەوەیی و سیاسەتی دەرەوە لە پەرلەمانی ئێران ئاشكرای دەكات، ئامانجی سەرەكی سەردانەكەی ئەمڕۆی مەسعود پزیشكیان، سەرۆككۆماری ئێران بۆ عێراق لابردنی سنووری نێوان هەردوو وڵاتە. 

لێدوانی فەرمی: ئەبو فەزڵ زەهراوەند، ئەندامی لیژنەکە لە لێدوانێكیدا بۆ میدیاكانی وڵاتەکەی، سەردانەكەی پزیشكیانی بۆ بەغدا بە هەنگاوێك بۆ لابردنی سنووری نێوان ئێران و عێراق وەسف کرد، بەو پێیەی عێراق نزیكترین بازنەی دەستگەیشتنی تارانە بە سووریا و لوبنان.

وێنە گەورەكە: كۆمەڵگەی نێودەوڵەتی ئێران بە دەستوەردان لە كاروباری ناوخۆی بەشێك لە وڵاتانی ناوچەی ڕۆژهەڵاتی ناوەڕاست و ئاژاوەنانەوە لە ناوچەكە تۆمەتبار دەكەن، بەتایبەت بە ئاشکرا پشتیوانی و هاوکاریی حەماس لە فەڵەستین، حیزبوڵڵا لە لوبنان و حکومەتی سووریا بەسەرۆکایەتیی بەشار ئەسەد دەکات، لە عێراقیش بەشێك لە گرووپە چەكدارەكانی حەشدی شەعبی لەلایەن ئێرانەوە پاڵپشتی و ئاراستە دەکرێن.

ئەوەی پێویستە بیزانیت: عێراق و ئێران هەزار و 458 كیلۆمەتر سنووری وشکانی و ئاوییان هەیە، ئێستا جگە لە هەڵگرتنی ڤیزا بۆ هاتووچۆی نێوان هەردوو وڵات، بەغدا و تاران كار بۆ پەرەپێدانی پەیوەندییە ئابوورییەكانیان دەکەن لەڕێگەی پێشكەشكردنی ئاسانكاری زیاتر بۆ ئاڵوگۆڕی بازرگانی، جگە لە هەماهەنگی ئەمنی بۆ ڕووبەڕووبوونەوەی مەترسی تیرۆر و زامنكردنی سەقامگیری سنوورەكان.