40 هەزار کارمەند هەڵبژاردنی پەرلەمانی کوردستان بەڕێوە دەبەن

ئاڤا نیوز

 

 

ئامادەکاری بۆ هەڵبژاردنی پەرلەمانی کوردستان بەردەوامە و لەو چوارچێوەیەشدا ئێستا کارمەندانی بنکەکانی کۆمیسیۆن ڕاهێنانیان پێ دەکرێت.

 

چیرۆکی سەرەکی:  بڕیارە لە 20-10-2024 لە ژێر چاودێری کۆمیسیۆنی باڵای سەربەخۆی هەڵبژاردنەکانی عێراق هەڵبژاردنی پەرلەمانی کوردستان بکرێت، بۆ ئەم مەبەستەش ژمارەیەکی زۆر لە کارمەند دانراوە بۆ سەر سندووقەکانی دەنگدان و لە ئێستادا ڕاهێنانیان پێدەکرێت.

 

لێدوانی فەرمی: مەروان محەممەد نەجاڕ، بەڕێوەبەری ئۆفیسی هەولێری کۆمیسیۆنی باڵای سەربەخۆی هەڵبژادنەکان بە ئاڤا نیوزی ڕاگەیاند، ئامادەکاری بۆ هەڵبژاردنی پەرلەمان بەردەوامە، ئێستا کارمەندانی بنکەکانی کۆمیسیۆن ڕاهێنانیان پێ دەکرێت، دواتر کارمەندانی سەر سندووقەکان ڕاهێنانیان پێ دەکرێت کە ژمارەیان 40 هەزار کارمەند دەبێت.

 

زانیاریی زیاتر: وادەی مۆڵەتی لایەنەکان بۆ پەڵپگرتن لە دوورخستنەوەی بەربژێرەکان کۆتایی نەهاتووە، تائێستا لە بەشی یاسایی کاروباری بەربژێرەکان ئەو پرسە کاری لەسەر دەکرێت.

 

ئەوەی پێویستە بیزانیت: بەپێی ئامارەکانی کۆمیسیۆنی باڵای سەربەخۆی هەڵبژاردنەکانی عێراق، دوو ملیۆن و 888 هەزار و 162 کەس لە هەرێمی کوردستان بۆ هەڵبژاردنی خولی شەشەمی پەرلەمانی کوردستان مافی دەنگدانیان هەیە، لەو ژمارەیەش، دوو ملیۆن و 672 هەزار و 43 کەس لە دەنگدانی گشتی و 216 هەزار و 119 کەسیش لە دەنگدانی تایبەت دەنگ دەدەن.