بازاڕی خانووبەرە لە عێراق بووەتە سەرچاوەی سپیکردنەوەی پارە

ئاڤا نیوز

 

وەبەرهێنان لە کەرتی خانووبەرە بووەتە شێوازێکی باو بۆ سپیکردنەوەی پارە لە عێراق، بەتایبەت دوای سزاکانی ئەمریکا بۆ سنووردارکردنی گواستنەوەی پارە و سزادانی بانکە عێراقییەکان  لەلایەن ئەمریکا، ئەم بازاڕە بووەتە ناوەندێک بۆ سپیکردنەوەی پارە لەلایەن بەشێک لە بەرپرسان و سەرمایەداران.

 

هۆکارە زانراوەکان: یاساکانی وەبەرھێنان لە عێراق کەموکوڕی و نەگونجانی زۆری تێدایە لەگەڵ یاساکانی دیکەی بازرگانی، هەروەها جیاوازییەکی زۆر ھەیە لەنێوان تێچوونی دروستکردن و نرخی فرۆشتنی پرۆژەکان. ئەمە بووەتە ھۆی ئەوەی بەشێک لە سەرمایەداران سوود لە وەبەرھێنان لەو بازاڕە وەربگرن بۆ سپیکردنەوەی پارە.

 

ئەوەی پێویستە بیزانیت: بەپێی یاسای ژمارە 13ـی وەبەرهێنان، پێویستە یاسا مافی وەبەرھێنەرە ناوخۆیی و بیانییەکان بپارێزێت،  بەڵام تاوەکو ئێستا شکستی  لە بەرگریکردن و پاراستنی سەرمایەی وەبەرھێنەرانھێناوە. 

 

زانیاریی زیاتر: بەپێی یاساکە، ئەو وەبەرھێنەرانەی لەم بازاڕەدا کار دەکەن، دەبێت باری دارایی و سامانی خۆیان بۆ حکومەت ئاشکرا بکەن، بۆ ئەوەی ڕێگە لە دروستکردنی پەیوەندیی نادروست بگیرێت و ڕێگە بە سپیکردنەوەی پارە نەدرێت.

 

لەلایەکی دیکەوە: زیادبوونی ژمارەی دانیشتووان و فراوانبوونی شارەکان بووەتە هۆی بەرزبوونەوەی خواست و زیادبوونی پڕۆژەکانی نیشتەجێبوون، بەڵام چاودێران دەڵێن ئەم پڕۆژانە قەیرانی نیشتەجێبوونیان چارەسەر نەکردووە. بۆ نموونە لە بەغدا پێویستییەکی زۆر هەیە بۆ دروستکردنی یەکەی نیشتەجێبوون، بەشێوەیەک ژمارەکە دەگات 4 ملیۆن یەکەی پێویست، بەڵام هاووڵاتیانی ئاسایی سوود لەم وەبەرهێنانانە نابینن، چونکە لەلایەن کۆمپانیاکان و گرووپە سیاسییەکانەوە کۆنترۆڵ دەکرێن کە شارەزایییان نییە.