هەرێمی کوردستان بۆ پزیشکیان:  پابه‌ندى‌ ڕێككه‌وتنى ئه‌منيى عێراق و ئێران دەبین

ئاڤا نیوز 

سەرۆكایەتیی هەرێمی كوردستان ناوەڕۆكی كۆبوونەوەی  سەرۆككۆماری ئێران و بەرپرسانی باڵای هەرێمی كوردستان ئاشكرا دەكات، مەسعود پزیشکیان دڵنیاکراوەتەوە کە هەرێمی کوردستان پابەندی ڕێککەوتنی ئەمنیی عێراق و ئێران دەبێت.

وێنە گەورەكە: ئەمڕۆ پێنجشەممە مەسعود پزیشكیان، سەرۆككۆماری ئێران بە سەردانێک گەیشتە هەولێر، لەگەڵ شاندێکی هەرێمی کورستان بە بەشداریی نێچیرڤان بارزانی و سەرۆکوەزیران مەسرور بارزانی کۆبووەوە، دواتر بە جیا لەگەڵ سەرۆک بارزانی کۆبووەوە، کۆبوونەوەیەکیشی لەگەڵ پێکهاتەکان کرد.

ڕاگەیێنراوی فەرمی: سەرۆكایەتیی هەرێمی كوردستان ڕایگەیاند: نێچيرڤان بارزانى، وێڕاى ده‌ربڕينى خۆشحاڵى، يه‌كه‌م سەردانی سەرۆككۆماری ئێرانی بۆ عێراق و هه‌رێمى كوردستان، به‌ په‌يامێكى به‌هێزى دۆستايه‌تيى نێوان هه‌ردوولا له‌قه‌ڵه‌م دا.

نێچیرڤان بارزانی خواستى هه‌رێمى كوردستانى بۆ بره‌ودان به‌ په‌يوه‌ندييه‌كان و فراوانكردنى هاريكاريى هاوبه‌ش له‌گه‌ڵ ئێران له‌ هه‌موو بواره‌كاندا نيشان دا‌. هه‌روه‌ها دووپاتى كرده‌وه‌ گه‌لى كوردستان هه‌ميشه‌ به‌ ڕێز و پێزانينه‌وه‌ له‌ پشتگيریى و هاوكاريى ئێران له‌ ڕۆژه‌ سه‌خته‌كاندا ده‌ڕوانێت.

بۆچوونی بەرامبەر: پزیشكیان، خۆشحاڵيى خۆى به‌ سه‌ردانى عێراق و هه‌رێمى كوردستان ده‌ربڕىوە و دووپاتى كردووەتەوە كه‌ كۆمارى ئيسلاميى ئێران به‌ بايه‌خ و گرنگييه‌وه‌ له‌ په‌يوه‌ندييه‌كانى له‌گه‌ڵ عێراق و هه‌رێمى كوردستاندا ده‌ڕوانێت، وڵاته‌كه‌ى خوازياره‌ له‌ هه‌موو بواره‌كان په‌يوه‌ندييه‌كانى له‌گه‌ڵياندا به‌ره‌وپێش ببات و گرفت و به‌ربه‌سته‌كانى به‌رده‌مى نه‌هێڵن.

لەلایەکی دیکەوە: لە كۆبوونەوەكەدا سەرۆكوەزیران مەسرور بارزانی و قوباد تاڵەبانی، جێگری سەرۆكوەزیران، باسيان له‌ ئاستى ئێستاى په‌يوه‌نديى ئابوورى و ئاڵۆگۆڕى بازرگانى و چۆنيه‌تيى فراوانكردنيان و بواره‌كانى هاريكاريى هاوبه‌شى نێوان هەردوولا كردووە.

ئەوەی پێویستە بیزانیت: لە کۆبوونەوەکەدا جه‌خت له‌وه‌ كرايه‌وه‌ كه‌ هه‌رێمى كوردستان هه‌رگيز نابێته‌ سه‌رچاوه‌ى هه‌ڕه‌شه‌ بۆ سه‌ر ئێران و وڵاتانى دراوسێ و به‌ته‌واوى پابه‌ندى‌ ڕێككه‌وتنى ئه‌منيى عێراق و ئێرانه‌.