ئەمریکا زیاتر لە هەزار بۆمب و چەکی دیکە بۆ ئیسرائیل دەنێرێت

ئاڤا نیوز 

 

لە سەروبەندی هەوڵدان بۆ ڕاگەیاندنی ئاگربەست و داواکردنی کۆتاییهێنان بە ئۆپەراسیۆنەکانی ئیسرائیل بۆ سەر کەرتی غەززە، ئەمریکا جارێکی دیکە سوپای ئیسرائیل پڕچەک دەکات.

 

وێنە گەورەکە: بەرپرسانی ئێستا و پێشووی ئەمریکا ئەوە پشتڕاست دەکەنەوە کە بەفەرمانی جۆ بایدن، بڕیارە لە چەند ڕۆژی داهاتوودا زیاتر لە هەزار بۆمبی MK-82 و مووشەکی KMU-572 وچەند پارچەیەکی FMU-139 کە بۆ مووشەکی زیرەک بەکاردێن بۆ ئیسرائیل بنێرێت. 

 

زانیاریی زیاتر: بەپێی هەواڵی وۆڵ ستریت جێرناڵ، ئەم پێشنیازە لەلایەن باڵیۆزخانەی ئەمریکا لە ئۆرشەلیم (قودس)ـەوە دراوەتە ئیسرائیل، ئەوانیش ڕەزامەندییان لەسەری دەربڕیوە، نرخی ئەو کەرەستە جەنگییانە دەگاتە نزیکەی 70 ملیۆن دۆلار.

 

کاریگەری و لێکەوتەکانی: لەکاتێکدا ئیسرائیل بەنیازی ئۆپەراسیۆنی ڕەفەحە کە زیاتر لە یەک ملیۆن و 400 هەزار ئاوارەی کەرتی غەززەی تێدایە، جیهان داوا لە ئیسرائیل دەکەن کە ئەو کارە نەکات، ئەمریکاش لەمکاتەدا سوپای ئیسرائیل پڕچەک دەکاتەوە، مەترسی ڕوودانی کارەساتی مرۆیی لە ئارادەیە.