پەرلەمانتارێکی عێراق: گرفت بۆ دابەشكردنی مووچە دروست نابێت

ئاڤا نیوز

ئەندامێکی لیژنەی دارایی پەرلەمانی عێراق دڵنیایی بە مووچەخۆران دەدات دابەزینی نرخی نەوت نابێتە گرفت بۆ دابەشکردنی مووچە، بۆ ئەم مەبەستە حکومەت زیاتر لە 145 ترلیۆن دیناری یەدەگی لەبەردەستدایە.

وێنە گەورەکە: لە چەند ڕۆژی ڕابردوودا نرخی بەرمیلێک نەوت بۆ کەمتر لە 70 دۆلار دابەزی، ئەمەش لەبارەی دابینکردن و دابەشکردنی مووچە دڵەڕاوکێی لای مووچەخۆران دروستکردووە.

لێدوانی فەرمی: موعین کازمی، ئەندامی لیژنەی دارایی پەرلەمانی عێراق ڕایگەیاند: حکومەتی عێراق پارەی یەدەگی لەبەردەستدایە و پێویست ناکات فەرمانبەران نیگەران بن, چونکە لە هەموو بارێکدا حکومەت مووچە دابەش دەکات.

 

لەلایەکی دیکەوە: جەمال کۆچەر، ئەندامی لیژنەی دارایی پەرلەمانی عێراق ڕایگەیاند: "دابەزینی نرخی دۆلار کاریگەری لەسەر مووچە نابێت, بەڵام کاریگەریی لەسەر دۆخی ئابووریی عێراق دەکات، چونکە عێراق بە ڕێژەی 90٪ پشت بە نەوت دەبەستێت".

 

ئەوەی پێویستە بیزانیت: دوای کۆبوونەوە ئابوورییەکان لە هەولێر، کێشەی مووچەی مووچەخۆرانی هەرێمی کوردستان چارەسەرکراوە، حکومەتی عێراق بڕیاری داوە تاوەکو کۆتای ئەمساڵ مووچە بێ کێشە بنێرێت. ئاڤا نیوز زانیویەتی وەزارەتی دارایی عێراق بەمزووانە دوو مووچە خەرج دەکات و ئەم هەفتەیە مووچەیەکیان دەگات.

 

باکگڕاوەند: لە دوو مانگی ڕابردوودا فەرمانبەرانی بەشێک لە وەزارەتەکانی عێراق مووچەیان دواکەتووە، بەم هۆیەوە فەرمانبەرانی چەند وەزارەتێک کە دیارترینیان وەزارەتی کارەبا بوو، لە چەند پارێزگایەک خۆپیشاندانیان دەکرد.