شاندێکی دارایی عێراق سەردانی هەرێمی کوردستان دەکات

ئاڤا نیوز 

 

بەمەبەستی بەدواداچوون و لێکۆڵینەوە لەو ڕێککەوتن و لێکتێگەیشتنە نوێیانەی لە نێوان هەولێر و بەغدا کراوە، شاندێک لە لیژنەی دارایی پەرلەمانی عێراق سەردانی هەرێمی کوردستان دەکات و لەگەڵ وەزیری دارایی هەرێمی کوردستان کۆدەبنەوە.

 

وێنە گەورەکە: هەفتەی ڕابردوو شاندی ئەنجوومەنی وەزاریی عێراق بۆ کاروباری ئابووری هاتنە هەرێمی کوردستان دوو کۆبوونەوەی گشتییان  بەسەرپەرشتیی سەرۆکوەزیران مەسرور بارزانی لەگەڵ ئەنجوومەنی ئابووریی هەرێمی  کوردستان کرد، ڕێککەوتن و لێکتێگەیشتن لەسەر پرسە دارایی، بازرگانی، گومرگ و دەروازەکان و کشتوکاڵی کرا.

 

لێدوانی فەرمی: د. جەمال کۆچەر، ئەندامی لیژنەی دارایی لە پەرلەمانی عێراق بە ئاڤا نیوزی گوت، "دەمانەوێ ئاسانکاری بۆ هەردوولا بکەین، بەمەبەستی لێکتێگەیشتن و ڕێککەوتن لەسەر پرسە هەڵپەسێردراوەکان، لە بەغدا ژمارەیەک وەزیری پەیوەستمان بینیوە، دەمانەوێ لەگەڵ ئەوانی هەرێمی کوردستانیش کۆببینەوە". 

 

زانیاریی زیاتر: بە گوتەی جەمال کۆچەر، شاندی لیژنەی دارایی لەگەل وەزیرانی دارایی، بازرگانی، کار و کاروباری کۆمەڵایەتی و کشتوکاڵی عێراق و هەرێمی کوردستان کۆدەبنەوە بۆ زانینی ناوەڕۆکی ڕێککەوتنی هەردوولا.

 

ئەوەی پێشبینی دەکرێت: عەتوان عەتوانی، سەرۆکی لیژنەی دارایی لە پەرلەمانی عێراق سەرۆکایەتی شاندەکە دەکات و چاوەڕوان دەکرێت لە چوارچێوەی سەردانەکەیان بۆ هەرێمی کوردستان لەگەڵ سەرۆکوەزیران مەسرور بارزانیش کۆببنەوە.