پێش کۆتایی ئەمساڵ دەست بە دابەشکردنی زەوی دەکرێت

ئاڤا نیوز

پێش کۆتایی ئەمساڵ و دروست لەماوەی 65 ڕۆژی داهاتوودا دەست بە دابەشکردنی زەویی بەسەر فەرمانبەران و خانەنشینان دەکرێت.

وێنە گەورەکە: نزیکەی 200 هەزار فەرمانبەر و خانەنشین لە وەرگرتنی زەوی سوودمەند دەبن و هەر کەسێک لە سنووری شوێنی دەوامکردنی 200 مەتری پێدەدرێت.

ئەوەی پێویستە بیزانیت: وەزارەتی شارەوانی لە ئامادەکارییەکان و تەواوکردنی ڕێکارەکان بەردەوامە و تا ئێستا 30%ی زەوییەکان بۆ دابەشکردن ئامادەکراون. 50%ـی فەرمانبەران و خانەنشینان فۆرمیان گەڕاندووەتەوە، پێویستە بەزووترین کات سەرجەمیان فۆرمەکە بگەڕێننەوە.

شێوازی جێبەجێکردن: پێویستە ڕەگەزی زەوییەکان لە کشتوکاڵەوە بۆ شارەوانی بگۆڕدرێت، ئەم پرۆسەیە دوو مانگی دەوێت. هەرێمی کوردستان خاوەنی 130 شارەوانییە، بەشێکیان ئەندازیار و فەرمانبەری شارەزایان کەمە و داوای دامەزراندنی فەرمانبەر دەکەن.

هەنگاوی داهاتوو: وەزارەتی شارەوانی وردبینی لە سەرجەم فۆرمەکان دەکات. ناوەکان بۆ ئەنجوومەنی وەزیران دەنێرێت و پێویستە سەرۆکوەزیران مەسرور بارزانی واژۆی بکات.

لێدوانی فەرمی: سەربەست مەولود، بەڕێوەبەری گشتیی کاروباری یاسایی لە وەزارەتی شارەوانی بە ئاڤا نیوزی گوت: "سەرجەم شارەوانییەکان نزیکەی 150 کەسیان پێویستە، ئەمڕۆ دووشەممە بە نووسراو داوا لە ئەنجوومەنی وەزیران دەکەین ڕەزامەندی بۆ دامەزراندنیان بە گرێبەست دەرببڕێت".

خاڵئ ئەرێنی:  سەربەست مەولوود ڕۆژی دەستپێکردنی دابەشکردنی زەوی بۆ ئاڤا نیوز ئاشکراکرد و گوتی: "دەبێت لە ماوەی 65 ڕۆژی داهاتوودا ڕێکارەکان تەواو بکرێن و دەست بە پرۆسەکە بکرێت".