هەرێمی کوردستان بۆ هەڵبژاردن چیدیکە چاوەڕێی بڕیاری دادگەی فیدراڵی ناکات

ئاڤا نیوز

 

سه‌رۆكایه‌تییه‌كانی هه‌رێمی كوردستان، دەیانەوێ دەرچەیەکی یاسایی بدۆزنەوە و چیدیکە چاوەڕێی بڕیاری دادگەی فیدراڵی ناکەن بۆ یەکلاکردنەوەی سکاڵای دژی یاسای هەڵبژاردن.

 

وێنه‌ گه‌وره‌كه‌: سه‌رۆكایه‌تییه‌كانی هه‌رێمی كوردستان، له‌گه‌ڵ لایه‌نه‌ سیاسییه‌كان بەدواى دەرچەیەکى یاساییدا دەگەڕێن، بۆ ئەوەى لەو ڕێگەیەوە پرسى هەڵبژاردنى پەرلەمانى کوردستان یەکلابکەنەوە، پرسی دواكه‌وتنی بڕیاری دادگەی باڵای فیدراڵی ئێستا به‌ڕژدی گفتوگۆی له‌باره‌وه‌ ده‌كرێت. 

 

زانیاریی تایبه‌ت: لە کۆبوونەوەى 13-02-2024  نێچیرڤان بارزانى و سەرۆکایەتیی دادگەى پێداچوونەوەى هەرێمی كوردستان، داوای لە سەرۆکایەتیى دادگەکە کردووە، ئه‌گەر 18ـى ئەم مانگە دادگەى فیدراڵى بابەتى سکاڵاکەى یاساى هەڵبژاردنى پەرلەمانى کوردستان دوابخات، کاری ڕژد بۆ دۆزینەوەى دەرچەیەکى یاسایی بۆ پرسی هه‌ڵبژاردن بکەن. 

 

لێدوانی فه‌رمی: ڕاوێژی سەرۆکی ھەرێمی کوردستان لەگەڵ سەرۆک و ئەندامانی دادگەی پێداچوونەوەى ھەرێمی کوردستان بەئامانجی دۆزینەوەی ڕێگەچارەی یاسایی کە زەمینەی پێویست بۆ ئەنجامدانی ھەڵبژاردن بڕەخسێنێت، چونکە ناکرێ دواکەوتنی ئەنجامدانی ھەڵبژاردن ھەروا بەردەوام بێت و دامودەزگاکانی ھەرێمی کوردستان لە بۆشایی ڕەوایەتی ھەڵبژاردندا بمێننەوە. دکتۆر عومەر نورەدینی، مامۆستای زانکۆ، وای  به‌  ئاڤا نیوز گوت. 

 

باکگراوند: دواخستنی ھەڵبژاردنی خولی شەشەمی پەرلەمانی کوردستان بەھۆی تۆمارکردنی سکاڵا دژی یاسای هەڵبژاردن بووە، لەماوەی ھەشت مانگدا دادگەی فیدراڵی 14 جار دادبینی بۆ داوا و سکاڵاکە کردووە، بەڵام تا ئێستا یەکلایی نەکراوەتەوە.