ئاڤا نیوز وادەی وەرگرتنی یەکەم مووچەی مامۆستایانی گرێبەست ئاشکرا دەکات

ئاڤا نیوز 

فەرمانی دامەزراندنی مامۆستایانی وانەبێژ لە قوتابخانەکان واژۆ دەکرێت و مووچەی مانگی نۆ بەگرێبەست وەردەگرن.

 لێدوانی فەرمی: کارۆخ عەبدوڵڵا گوڵاوی، نوێنەری گشتیی مامۆستایانی وانبێژ بە ئاڤا نیوزی ڕایگەیاند،  ئەمڕۆ دووشەممە فەرمانی دامەزراندنی مامۆستایانی وانەبێژ بە گرێبەست لەلایەنی ئەنجوومەنی وەزیران واژۆکراوە و ئاراستەی وەزارەتی دارایی کراوە.

زانیاریی زیاتر: مامۆستایانی وانبێژ شایستەی دارایی سێ مانگی ڕابردوو (شەش، حەوت و هەشت)یان وەرنەگرتووە، ئەم سێ مانگە شایستەی داراییان هاوشێوەی ڕابردوو دەبێت و بۆ مانگی نۆ یەکەم مووچەی گرێبەست وەردەگرن.

ئەمەش بزانە: مامۆستایانی وانەبێژ لە قەتابخانەکان ژمارەیان 38 هەزار کەسە، مووچەی گرێبەستیان بۆ دیبلۆم 400 هەزار دینار و بۆ بەکالۆریۆس 500 هەزار دینار دەبێت.

باکگراوند: ئێوارەی دوێنێ یەکشەممە د.ئومێد سەباح، سەرۆکی دیوانی ئەنجوومەنی وەزیرانی هەرێمی کوردستان، لە یەکەم گەشتی هەواڵەکانی تەلەڤزیۆنی ئاڤا مژدەی بە مامۆستایانی وانەبێژ دا کە ئەمڕۆ فەرمانی بەگرێبەستکردنیان واژۆ دەکرێت.