شاندێکی هەولێر و بەغدا لەبارەی هاوتاکردنی مووچەی خانەنشینان گفتوگۆ دەکەن

ئاڤا نیوز 

 

گەڕێکی دیکەی دانووستانەکانی نێوان هەردوو حكومەتی هەرێمی کوردستان و عێراق لەسەر پرسی مووچە دەستپێدەکاتەوە.

 

چیرۆکی سەرەکی: شاندێکی حکومەتی هەرێمی کوردستان بۆ گفتوگۆکردن لەسەر چەند پرسێکی تایبەت لە بەغدایە و بڕیارە لە ئەمڕۆوە گفتوگۆکانیان دەستپێبکەن.

 

لێدوانی فەرمی: پێشتر د. ئومێد سەباح، سەرۆکی دیوانی ئەنجوومەنی وەزیرانی هەریمی کوردستان لەمیانەی بەشداریکردنی لە گەشتی هەواڵەکانی کاتژمیر 7:00 ــی ئاڤا نیوزی ڕایگەیاند: کۆبوونەوەیەک لەگەڵ لایەنی عێراقی دەکەن، بۆ ئەوەی بزانن مووچەی خانەنشینانی سەربازی و ئەمنی چۆن هاوتا دەکرێت.

زانیاریی زیاتر: بڕیارە ئەمڕۆ شاندەکەی حکومەتی هەرێمی کوردستان لەگەڵ کاربەدەستانی حکومەتی عێراقدا کۆبوونەوە بکەن، تەوەری سەرەکی کۆبوونەوەکەش پرسی هاوتاکردنی مووچەی خانەنشینانی پێشمەرگەیە.

 
ئەوەی پێویستە بیزانیت: عێراق ماوەی 10 ساڵە کار بە یاسایەکی تایبەت دەکات سەبارەت مووچەی خانەنشینی مەدەنی و سەربازی، حکومەتی هەرێمی کوردستانیش دەیەوێت لەگەڵ حکومەتی فیدڕاڵدا بگاتە ڕێککەوتن، بۆ ئەوەی یاساکە بە تەواوی بەسەر فەرمانبەرانی هەرێمیشدا جێبەجێ بکرێت و ڕێچکەی خۆی بگرێت.

 

باکگراوند: هەرێمی کوردستان خاوەنی 250 هەزار خانەنشینی سەربازی و مەدەنییە لەو ژمارەیەش 90 هەزاریان خانەنشینی سەربازی پێشمەرگەن، بەهۆی چەند گرفتێکەوە تاوەکو ئێستا مووچەکانیان لەگەڵ خانەنشینانی عێراق هاوتا نەکراوە.