ئیخڵاس دلێمی بۆ ئاڤا: ناردنی مووچە بۆ هەرێمی کوردستان چیتر پێویستی بە گفتوگۆ نییە

ئاڤا نیوز

جێگری سەرۆکی لیژنەی دارایی پەرلەمانی عێراق دەڵێت، ناردنی مووچەی فەرمانبەرانی هەرێمی کوردستان چیتر پێویستی بە گفتوگۆ نییە و ئەو پرسە یەکلایی بووەتەوە.

وێنە گەورەکە: ئەم هەفتەیە گفتوگۆکانی هەولێر و بەغدا لەبارەی چارەسەرکردنی پرسی مووچە چڕتر دەبنەوە، ڕۆژی دووشەممە 23-9-2024 شاندێکی باڵای حکومەتی هەرێمی کوردستان دەچێتە بەغدا و ڕۆژێک دواتر شاندێکی لیژنەی دارایی پەرلەمانی عێراق سەردانی هەولێر دەکات.

لێدوانی فەرمی: ئیخڵاس دلێمی، جێگری سەرۆکی لیژنەی دارایی پەرلەمانی عێراق بە ئاڤای ڕاگەیاند، بابەتی مووچەی فەرمانبەرانی هەرێمی کوردستان ئێستا لە دەرەوەی دانوستاندنەکانە، بەپێی بڕیارەکانی دادگەی فیداڵی ئەو بابەتە یەکلایی بووەتەوە.

لەلایەکی دیکەوە: لەبارەی دواکەوتنی دابەشکردنی مووچە لە عێراق، پێچەوانەی ڕاگەیێنراوی وەزارەتی دارایی عێراق کە ڕەتیدەکاتەوە کێشەی پارەی نەختینە (سیولە) یان هەبێت، ئیخلاس دلێمی دەڵێت دواکەوتنەکە بەهۆی نەبوونی سیولەیە. 

ئەوەی پێویستە بیزانیت: شاندی باڵای هەرێمی كوردستان بە سەرۆكایەتیی د.ئومێد سەباح، سەرۆكی دیوانی ئەنجوومەنی وەزیران، ڕۆژی دووشەممە 23-9-2024 سەردانی بەغدا دەکات و لیستی نوێی مووچە لەگەڵ خۆیان دەبەن، بڕیارە دوو ڕۆژ دواتر مووچەی مانگی هەشت بۆ هەرێمی کوردستان بنێردرێت و دوو هەفتەش دواتر مووچەی مانگی نۆ.

باکگراوند: بەپێی ڕێککەوتنی هەردوو حکومەتی هەرێمی کوردستان و عێراق پاڵپشت بە بڕیاری دادگای فیدراڵی، خەرجکردنی مووچە بۆ هەرێمی کوردستان گەرەنتی کراوە و تاوەکو کۆتایی ئەمساڵ بێ کێشە مووچە دەنێردرێت، لەمەودوا دابەشکردنی مووچەش لە کوردستان و عێراق هاوکات دەکرێت.