ئەمڕۆ سەرۆکوەزیران مەسرور بارزانی چەند پرۆژەیەک لە زاخۆ دەکاتەوە

ئاڤا نیوز 

 

لە یادی سێ ساڵەی بوون بە ئیدارەی سەربەخۆ، سەرۆکوەزیران مەسرور بارزانی چەند پرۆژەیەکی گرنگ لە زاخۆ دەکاتەوە و بەردی بناغەی پرۆژەیەکی دیکەش دادەنێت.

 

چیرۆکی سەرەکی: ئەمڕۆ شەممە، سەرۆکوەزیران مەسرور بارزانی سەردانی ئیدارەی سەربەخۆی زاخۆ دەکات، هاوکات بەردی بناخەی جووتسایدی شێخان-لالش لە پارێزگای دهۆک دادەنێت.

 

زانیاریی پەیامنێر: جاسم محەممەد پەیامنێری ئاڤا نیوز لە زاخۆ ڕایگەیاند، سەرۆکوەزیران، نیوەڕۆ گەورەترین کارگەی ئامادەکردنی ئارد و بەرهەمە گەنمییەکان لە سنووری ناحیەی باتێلێ دەکاتەوە.

 

پەیامنێری ئاڤا ئەوەشی خستەڕوو سەرۆکوەزیران لە نزیک زاخۆ پڕۆژەی گەشتیاری "گوندی سپی" دەکاتەوە، هاوکات سەردانی قشڵەی زاخۆ دەکات، لە سەردانەیەکەیشیدا بەشداری لە ئاهەنگی سێ ساڵەی ئیدارەی سەربەخۆی زاخۆ دەکات.

 

لەلایەکی دیکەوە: لە کاتژمێر 10:00ی بەیانی سەرۆکوەزیران، بەردی بناغەی جووتسایدی شێخان-لالش لە دهۆک دادەنێت.

 

باکگراوند: لەکابینەی نۆیەمی حکومەتی هەرێمی کوردستان، گرنگییەکی زۆر بە کەرتە جیاوازەکان دراوە لە زاخۆ، هاوکات لە کابینەکەدا زاخۆ لە قەزاوە بووەتە ئیدارەی سەربەخۆ.