لە بەغدا کۆنفرانسی گۆڕانکارییەکانی ئاو و هەوا بە بەشداریی هەرێمی کوردستان ڕێکدەخرێت

ئاڤا نیوز

 

یەکەم کۆنفرانسی تایبەت بە گۆڕانی ئاو و هەوا لە بەغدا بەڕێوەدەچێت، شاندێکی حکومەتی هەرێمیش بە سەرۆکایەتیی وەزیری تەندروستی ئامادەی کۆنفرانسەکەیە.

 

وێنە گەورەکە: عێراق پێنجەم زەرەمەندترین وڵاتە لە گۆڕانکارییەکانی ئاو و هەوا لە جیهاندا، بۆ ئەو مەبەستەش ئەمڕۆ یەکشەممە 22ـی ئەیلوولی 2024، چالاکییەکانی یەکەمین کۆنفرانس لەمبارەیەوە بە ناونیشانی "کۆنفرانسی نێودەوڵەتیی یەکەم بۆ گۆڕانی ئاو هەوا و کاریگەرییەکانی لەسەر ئاسایشی تەندروستی لە عێراق" دەستیپێکرد.

 

ڕاگەیێنراوی فەرمی: لەتیف ڕەشید، سەرۆککۆماری عێراق لە گوتارێکیدا لە کۆنفرانسەکەدا گوتی: خراپیی ژینگە و بەرزیی پلەکانی گەرما و کەمبوونی سەرچاوەکانی ئاو، هەمووی کاریگەریی لەسەر بڵاوبوونەوەی نەخۆشی و زیادبوونی فشار لەسەر کەرتی تەندروستی کردووە و بووەتە هەڕەشە لەسەر ئاسایشی خۆراک و ئاو.

 

زانیاریی زیاتر: سامان بەرزنجی، وەزیری تەندروستی هەرێمی کوردستان لە کۆنفرانسەکە ئامادەیە و گوتارێک لەبارەی کەرتی تەندروستی لە هەرێمی کوردستان پێشکەش دەکات.

 

ئەمەش بزانە: 27 ڕاوێژکار و بەڕێوەبەری گشتی و بەرپرسی حکومەتی هەرێـمی کوردستانیش ئامادەن.

 

ئەوەی پێویستە بیزانیت: بەپێی سەرۆکوەزیرانی عێراق، حەوت ملیۆن هاووڵاتیی عێراق زەرەمەندبوونە لە گۆڕانکارییەکانی ئاو و هەوا.