بەهۆی شەڕی ئیسرائیل و حیزبوڵڵا  زێڕ نرخێکی مێژوویی تۆمار دەکات

ئاڤا نیوز

نرخی زێڕ لە سەرەتای کرانەوەی بازاڕەکانی جیهان لەم هەفتەیەدا بەرزبوونەوەیەکی نوێی تۆمارکرد و نرخی ئۆنسەیەک گەیشتە دوو هەزار و 629 دۆلار.

وێنە گەورەکە: ئەمڕۆ دووشەممە نرخی زێڕ بە بەرزبوونەوەیەکی نوێ دەستیپێکرد، نرخی هەر ئۆنسەیەک  گەیشتە دوو هەزار و 629$ دۆلاری ئەمریکی. لە بازاڕەکانی هەرێمی کوردستان مسقاڵێک زێڕی عەیار 21 بەرزبووەتەوە بۆ 556 هەزار و مسقاڵێک زێڕی عەیار 24 بە 630 هەزار دینار مامەڵەی پێوە دەکرێت.

هۆکارە زانراوەکان: گرژی و ئاڵۆزییەکانی ڕۆژهەڵاتی ناوەڕاست، بەردەوامی شەڕی نێوان ڕووسیا و ئۆکراینا، جەنگی غەززە و هێرشەکانی حیزبوڵڵا و ئیسرائیل بۆ سەر یەکتر، هەڵبژاردنەکانی ئەمریکا و دابەزاندنی ڕێژەی سوو لە دیارترین هۆکارەکانن بۆ بەرزبوونەوەی خواست لەسەر کڕینی زێڕ لەمساڵدا.

ئەوەی پێویستە بیزانیت: هەڵکشانی گرژییەکانی نێوان ئیسرائیل و حیزبوڵڵای لوبنان بەتایبەت هێرشەکانی شەوی ڕابردوو هۆکاری سەرەکین بۆ بەرزبوونەوەی زیاتری نرخی زێڕ، بەجۆرێک بەراورد بە کاتی داخستنی بازاڕە داراییەکان لە ڕۆژی هەینیدا 9% بەرزبووەتەوە. 

ئەوەی پێشبینی دەکرێت: لە ئەگەری بەردەوامی گرژییەکان، شارەزایانی بازاڕ پێشبینی بەرزبوونەوەی بەردەوامی نرخی زێڕ دەکەن.

 

باکگراوند: هەفتەی ڕابردوو بەهۆی دابەزاندنی ڕێژی سوو لەلایەن یەدەگی فیدراڵی ئەمریکا (بانکی ناوەندی) نرخی زێڕ بەرزترین ئاستی لە مێژوودا تۆمارکرد  و نرخی یەک ئۆنسە گەیشتە سەرووی دوو هەزار و 600 دۆلاری ئەمریکی، یەکەمجاریشە بگاتە دوو هەزار و 629 دۆلار.