وەزارەتی دارایی: بەغدا ئامادەنییە پارە بۆ پلەبەرزکردنەوەی فەرمانبەران تەرخان بکات

ئاڤا نیوز

حکومەتی هەرێمی کوردستان ئەرکی خۆی لە پلەبەرزکردنەوەی فەرمانبەران جێبەجێ کردووە، پرۆسەکەی تەواوکردووە و لیستی مووچەی فەرمانبەرانی بە پلەبەرزکردنەوە ئاراستەی بەغدا کردووە، بەڵام تاوەکو ئێستا حکومەتی عێراق ڕەزامەندی لەسەر نەداوە.

 

وێنە گەورەکە: لە ساڵی 2016ـەوە بەهۆی قەیرانی دارایی و نەناردنی بەشە بودجەی هەرێمی كوردستان لەلایەن حكومەتی عێراق، پلەبەرزكردنەوەی فەرمانبەران ڕاگیراوە، ئەمساڵ پرۆسەکە دەستیپێکردەوە، هەر فەرمانبەرێک پلەیەک یان دوو پلە بەرزکرایەوە و لیستی مووچەیان بە پلەبەرزکردنەوە ئاراستەی بەغدا کرا، بەڵام تاوەکو ئێستا حکومەتی عێراق ڕەزامەندی لەسەر نەداوە و بڕی زیادەی مووچەیان بۆ نەبەستراوە.

لێدوانی فەرمی: هونەر جەمال، گوتەبێژی وەزارەتی دارایی و ئابووری بە ئاڤا نیوزی گوت، "لە مانگی دووەوە لیستی پلەبەرزکردنەوە ئامادەکرا و ئەوەی لەسەر حکومەتی هەرێمی کوردستان بوو جێبەجێی کرد، بەڵام حکومەتی عێراق ئامادەنەبوو تەرخانی دارایی بکات و دەڵێت لە تواناماندا نییە، چارەسەری پرسەکە پێویستی بە دانوستاندنی نێوان هەولێر و بەغدا هەیە."

بۆچی گرنگە: زیاتر لە 500 هەزار مووچەخۆر لە پرۆسەی پلەبەرزکردنەوە سوودمەند دەبن، هەر فەرمانبەرێک (25 بۆ 125 هەزار دینار) بۆ مووچە بنەڕەتییەکەی زیاد دەبێت.