شەپۆلی ئاوارەبوونی خەڵکی لوبنان بەردەوامە

ئاڤا نیوز

 

شەپۆلی ئاوارەبوونی هاووڵاتیانی لوبنان بەهۆی گرژییەکانی نێوان حیزبوڵڵای لوبنان و سوپای ئیسرائیلەوە بەردەوامە و تەنیا ئەمڕۆ نزیکەی 5 هەزار هاووڵاتیی لوبنانی و سووری لە خاکی لوبنانەوە چوونەتە سووریا.

 

وێنە گەورەکە: ماوەی هەفتەیەکە گرژیی و ئاڵۆزییەکانی نێوان سوپای ئیسرائیل و حیزبوڵڵای لوبنان لە خاکی لوبنان بەردەوامە و تاوەکو ئێستا بەهۆی هێرشەکانی ئیسرائیل بۆسەر پێگەکانی حیزبوڵڵای لوبنانی 558 هاووڵاتیی لوبنانی گیانیان لەدەستداوە و هەزار و 835 کەسیش برینداربوون، لەوانە 50 منداڵ و 94 ژنی تێدایە.

 

بڵاوکراوەی فەرمی: ڕۆژنامەی "وەتەن"ی سووری بڵاویکردەوە، ڕۆژی سێشەممە 24-9-2024 نزیکەی پێنج هەزار هاووڵاتی سووری و لوبنانی لە ڕێگەی دەروازەی جدیدە یابوسی لوبنان چوونەتە ناو سوریا.

 

بەگوێرەی ڕۆژنامەی وەتەن: تا نیوەڕۆی ئەمڕۆ نزیکەی 2 هەزار هاووڵاتیی لوبنانی چوونەتە ناو خاکی سوریا و تا ئێستاش نزیکەی 3 هەزار هاووڵاتی سووری لە لوبنانەوە گەڕاونەتەوە سوریاوە.

 

لەلایەکی دیکە: عەمید مەهزەب مودی، بەڕێوەبەری بەرگری شارستانی لە حومس ڕایگەیاند: 5 ناوەند کە توانای لەخۆگرتنی نزیکەی 40 هەزار کەسی هەیە لە پارێزگاکە، ئامادەکراوە، هاوکات 9 ناوەندی دیکەی یەدەگ کە دەتوانێت نزیکەی 25 هەزار کەس لەخۆ بگرێت، بە هەموو خزمەتگوزارییە پێویستەکانەوە ئامادەکراون.

 

باکگراوند: ڕۆژی هەینی 20-9-2024، ئیسرائیل لە هێرشێکی ئاسمانیدا بۆ سەر باشووری بەیرووت 37 ئەندامی حیزبوڵڵا و سەرکردەیەکی دیاری ئەم گرووپەی بە ناوی ئیبراهیم عەقیل کردە ئامانج، بەهۆی بەردەوامی بۆردومانەکانەوە لەماوەی 48 کاتژمێری ڕابردوودا 558 هاووڵاتی لوبنانی گیانیان لەدەستداوە.