لێدوانی دژ بەیەكی عێراق و ئەمریكا لەسەر هاوپەیمانی نێودەوڵەتیی

ئاڤا نيوز

لەگەڵ ئەوەی محەممەد شیاع سوودانی، سەرۆكوەزیرانی عێراق لەگەڵ ئەو بەرپرسانەی وڵاتانی رۆژئاوایی كە لە پەراوێزی كۆنفرانسی میونشن لەگەڵیان كۆدەبوویەوە دەیگوت "وڵاتەكەی هەوڵدەدات بۆ كۆتاییهێنان بە ئەركی هاوپەیمانی نێودەوڵەتیی"، بەڵام واشنتن قسەیەكی جیاواز دەكات و دووپات لەسەر هاوبەشێكی ئەمنیی بەردەوام دەكاتەوە.

لێدوانی فەرمی: سوودانی لە میونشن بە دەیڤد كامیرۆن وەزیری دەرەوەی بەریتانیا، یەنس ستۆڵتبێرگ سكرتێری گشتی ناتۆ، ئەندامانی كۆنگرێسی ئەمریكای گوت "عێراق پێداچوونەوە دەكات بە پەیوەندییەكانی لەگەڵ هاوپەیمانی نێودەوڵەتیی و كۆتاییهێنان بە ئەركەكەی لە عێراق". نووسینگەی راگەیاندنی سەرۆكوەزیرانی عێراق بڵاویكردەوە" سوودانی لەگەڵ كامالا هاریس جێگری سەرۆكی ئەمریكا كۆبووەوەو جەختیكردەوە لەسەر بەردەوامیدان بە دیالۆگی لیژنە هاوبەشەكانی نێوان واشنتن و بەغدا بۆ كۆتاییهێنان بە ئەركی هاوپەیمانی نێودەوڵەتی دژی داعش لە عێراق.

لە لایەكی دیكەوە: كۆشكی سپی دەڵێت، هاریس داوای لە سوودانی كردووە كە ڕێگری بكات لە هێرشی گرووپە چەكدارەكان بۆ سەر سەربازەكانی ئەمریكا و  دوای كۆبوونەوەكەی سوودانی و هاریس، ئەلینا رۆمانۆوسكی باڵیۆزی ئەمریكا لە عێراق لە تۆڕی كۆمەڵایەتی ئێكس جەختیكردەوە "لەسەر هاوبەشی بەهێزو بەردەوامی نێوان واشنتن و بەغدا كە لەچوارچێوەی ڕێككەوتنی ستراتیژی نێوان هەردوو وڵات باس كراوە.