هەرێمی کوردستان کار بۆ ناساندنی کەرتی گەشتوگوزاریی دەکات

ئاڤا نیوز 

 

ڕێکخراوی گەشتوگوزاری جیهانی سەر بە نەتەوە یەکگرتووەکان (UNWTO)، بەرواری 27ی ئەیلولی هەموو ساڵێکی دیاریکردووە بۆ ڕۆژی جیهانی گەشتوگوزار و هەر ساڵەی لە وڵاتێک چالاکی تایبەت بەم بۆنەیە ئەنجام دەدرێت. 

 

وێنە گەورەکە: بۆ ساڵی 2024، ڕێکخراوی گەشتوگوزاری جیهانی، لە ژێر درووشمی “ گەشتوگوزار و ئاشتی” شاری تبلیسی جۆرجیا هەڵبژاردووە بۆ ئەنجامدانی چالاکی بە بۆنەی ڕۆژی جیهانی گەشتیاری و بەرز راگرتنی ئەم یادە.

 

لێدوانی فەرمی: ئەمەل جەلال، سەرۆکی دەستەی گەشتوگوزاری هەرێم ڕایگەیاند، ساڵی 2024 دەستەی گەشتوگوزاری هەرێمی کوردستان هەوڵەکانی چڕکردەوە بە ئاڕاستەی زیاتر بە بازاڕکردن بۆ کەرتی گەشتوگوزار و ناساندنی هەرێمی کوردستان وەک ڕووگەیەکی گەشتیاری لەسەر ئاستی ناوچەکە و جیهان.

 

ئەمەل جەلال دەڵێت: کاری دەستی بۆ گەشتیاران سەرنجڕاکێشە، بۆ ئەم مەبەستە بە پاڵپشتی دارایی ئاژانسی ئەمریکا بۆ پەرەپێدانی نێودەوڵەتی USAID توانرا خولی کارە دەستییەکان بۆ زیاتر لە 150 ژن و گەنج لەسەرجەم شارەکان بکرێتەوە کە کاریگەری گەورەی دەبێت لە سەر بەرزکردنەوەی ئاستی کواڵیتی بەرهەمی کارە دەستییەکان و بە بڕاند کردنیان. 

 

ئەوەی پێویستە بیزانیت: سەرەڕای ئەمە هاوکات لەگەڵ رێکخراوی UNDP کار دەکرێت بۆ پەرەپێدانی جۆرەکانی گەشتوگوزار و لەم چوارچيوەیەشدا لە ئێستادا هەنگاوەکانی ئامادەکردنی ستراتیژیەتی پەرەپێدانی گەشتوگوزاری ژینگەیی Eco-Tourism دەستیپێکردووە و لە ماوەی نزیکی داهاتوودا هەرێمی کوردستان بۆ یەکەم جار دەبێتە خاوەنی ستراتیژیەیی گەشتوگوزاری ژینگەیی.