لە کابینەی نۆیەم نزیکەی 200 هەزار هەلی کار ڕەخسێنراون

ئاڤا نیوز

لە ماوەی پێنج ساڵی تەمەنی کابینەی نۆیەم، بە گۆی گشتی نزیکەی 200 هەزار هەلی کار ڕەخسێنراون، لەو ژمارەیە 130 هەزار هەلی کاریان لە سێکتەری وەبەرهێنان بووە و زیاتر لە 80%ی سوودمەندبووان گەنجانی هەرێمی کوردستانن.

چیرۆکی سەرەکی: کابینەی نۆیەمی حکومەتی هەرێمی کوردستان لە پێنج ساڵی ڕابردوودا دەیان هەزار هەلی کاری ڕەخساندووە، گوتەبێژی دەستەی وەبەرهێنانیش دەڵێت: کارگە و کۆمپانیا بیانییەکان پابەندی ڕێنماییەکانن بۆ ڕەخساندنی دەرفەتی کار بە گەنجانی هەرێمی کوردستان. 

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان بە ئاڤا نیوزی ڕاگەیاند، جگە لە ڕەخساندنی زیاتر لە 130 هەزار هەلی کار، دەیان هەزار هەلی کاری ناڕاستەوخۆش ڕەخسێنراون، هاوکات تەواوی کارگە و پرۆژەکانی وەبەر‌‌هێنان بەپێی ڕینماییەکان ئاگادارکراونەتەوە زیاتر لە 75%ی دەستی کاریان ناوخۆیی بێت.

لەلایەکی دیکەوە: گوتەبیژی دەستەی وەبەرهێنان لەبارەی کۆمپانیا بیانییەکان دەڵێت: "90%ی دەستی کار لە کۆمپانیا و کارگە بیانییەکان ناوخۆییە". 

ژمارەکان وادەڵێن: بەشێک لە کارەکانی کابینەی نۆیەم:

- تەنیا لە سێکتەری وەبەرهێنان زیاتر لە 130 هەزار هەلی کار ڕەخسێنراون.

- ساڵی 2024 گرێبەست بۆ 38 هەزار مامۆستای وانەبێژی كەرتی پەروەردە کرا.

- چوار هەزار و 925 دەرچووی یەکەمی زانكۆ و پەیمانگەكان لە ساڵی خوێندنی 2016-2017 تاوەکو 2020-2021 بڕیاری دامەزراندیان بۆ دەرچووە.

- 15 هەزار هەلى كار لە كارگە پيشەسازییەكانەوه ڕەخسێنراون.

- نۆ هەزار و 500 گەنج لە ئەنجامی دەستپێکردنەوەی قەرزی بچووک بۆ لاوان سوودمەند بوون.

- نزیکەی نۆ هەزار و 718 کەس لە ڕاهێنانی پیشەیی سوودمەند بوون. هاوکات هەزار و 407 کەس لە چاکسازییەکان لە وۆرکشۆپە جۆراوجۆرەکان سوودمەند بوون، 403 کەسیش لە گرتووخانەی چاکسازییەکان لە خوێندن سوودمەند بوون.

- زیاتر لە 87 هەزار و 991 کرێکاری ناوخۆیی و بیانی دەستەبەر کراون، هاوکات 22 هەزار و 874 پڕۆژە دەستەبەریان بۆ کراوە.