چەند بڕیارێکی نوێ لەبارەی هەڵبژاردن دەردەکرێن

ئاڤا نیوز

 

لیژنەی باڵای ئەمنی هەڵبژاردنی پەرلەمانی کوردستان کۆبوونەوە و چەند  بڕیارێکیان لە بارەی ڕۆژانی دەنگدانی تایبەت و گشتیی دەرکرد، لە ڕۆژانی دەنگدان هاتوچۆ ئاسایی دەبێت و بردنە ژوورەوەی مۆبایل بەهەموو شێوەیەک قەدەغەیە.

 

چیڕۆکی سەرەکی: 19 ڕۆژ ماوە بۆ دەستپێکردنی پڕۆسەی دەنگدانی تایبەت، لیژنەی باڵای ئەمنی بەسەرپەرشتیی ڕێبەر ئەحمەد، وەزیری ناوخۆ لەبارەی هەڵبژاردنی پەرلەمانی کوردستان کۆدەبێتەوە و چەند بڕیارێکی نوێ دەردەکات، جەخت لەوە دەکاتەوە کە هەڵبژاردن لە وادەی دیاریکراوی خۆیدا دەکرێت.

 

لێدوانی فەرمی: ئومێد خۆشناو، پارێزگاری هەولێر بە ئاڤا نیوزی ڕاگەیاند: لە ڕۆژانی دەنگدانی تایبەت و گشتیی بردنە ژوورەوەی مۆبایل بە هەموو شێوەیەک قەدەغە دەبێت، هاوکات قەدەغەی هاتووچۆ ڕاناگەیێنرێت و هاوشێوەی ڕۆژانی ئاسایی هاتووچۆ دەکرێت، دەروازە سنوورییەکان و فڕۆکەخانەکانیش داناخرێن.

 

لەلایەکی دیکەوە: هێمن میرانی، بەڕێوەبەری دیوانی وەزارەتی ناوخۆی حکومەتی هەرێمی کوردستان، دوای کۆبوونەوەکە لە کۆنگرەیەکی ڕۆژنامەوانیدا ڕایگەیاند، هەڵبژاردن لەکاتی خۆیدا دەکرێت و هیچ ئاماژەیەک نییە بۆ گواستنەوەی پریشکی ئاگری گرژی و ئاڵۆزییەکانی نێوان ئێران و حیزبوڵڵای لوبنان بۆ هەرێمی کوردستان.

 

زانیاریی زیاتر: هێمن میرانی جەختی کردەوە، هەموو ئامادەکارییە ئەمنییەکان کراون بۆ بەڕێوەچوونی هەڵبژاردنێکی ئارام، هەڵبژاردن ئازادانە دەبێت و هیچ هێزیک ناتوانیت فشار لە دەنگدەر بکات دەنگ بە لایەنێک بدات.