دوایین زانیاریی لەبارەی پڕۆسەی دابەشکردنی زەوی بەسەر فەرمانبەران و خانەنشینان

ئاڤا نیوز

 

وەزارەتی شارەوانی و گەشتوگوزاری هەرێمی کوردستان پڕۆسەی وردبینی لە فۆڕمی دابەشکردنی زەوی دەستپێکردووە، بەشێکی شارەوانییەکان نەخشەی زەوییەکانیان ئامادەیە و پێش کۆتایی ئەمساڵ جگە لە زاخۆ لە چەند شار و شارۆچکەیەکی دیکە دەست بە پڕۆسەی دابەشکردنی زەوی دەکرێت.

 

وێنە گەورەکە: لەسەرەتای مانگی 10 پڕۆسەی دابەشکردنی زەوی لە زاخۆ دەستپێدەکات، لە وەزارەتی شارەوانی فۆڕمی فەرمانبەر و خانەنشینانی سنووری ئیدارەی سەربەخۆی زاخۆ جیاکراونەتەوە، بۆ ئەوەی بگەڕێنرێتەوە شارەوانی ئەو شارە و دەست بە پڕۆسەی دابەشکردنی زەوییەکان بکرێت، پێش کۆتایی ئەمساڵ لە چەند ناوچەیەکی دیکەش پڕۆسەکە دەستپێدەکات.

 

لێدوانی فەرمی: سەربەست مەولوود، بەڕێوەبەری كاروباری یاسایی لە وەزارەتی شارەوانی  بە ئاڤا نیوزی ڕاگەیاند: "وردبینی لە زەوی و موڵکدارییان دەستیپێکردووە، ئەو زەوییانەی سەر بە وەزارەتی دارایین تەواو بوو، پڕۆسەکە خێرا کراوە بۆ ئەوەی پێش کۆتایی ئەمساڵ لە هەولێر و چەند ناوچەیەکی دیکە دابەشکردنی زەوی دەستپێدەکات".

 

ئەوەی پێویستە بیزانیت: لە پارێزگاکانی هەولێر 80 هەزار پارچە زەوی ئامادە دەکرێت، دهۆک و ئیدارەی سۆران 50% ڕێکارەکانی دابەشکردنی زەوی تەواوبوون، لە سلێمانی پڕۆسەی گۆڕینی تاپۆی زەوییەکان بەردەوامە لیژنەیەکی شارەوانی کار لەسەر جیاکردنەوە زەوییەکان دەکات.

 

لەلایەکی دیکەوە: ڕۆژی هەینی 27-09-2024 ساسان عەونی، وەزیری شارەوانی و گەشتوگوزار لە گەشتی هەواڵەکانی کاتژمێر 7:00ی ئاڤا کە هەوراز گوڵپی پێشکەشی دەکات ڕایگەیاند: "بەهۆی زوو تەواو بوونی ڕێکارەکانی دابەشکردنی زەوی لە ئیدارەی سەربەخۆی زاخۆ، لە دوو هەفتەی داهاتوودا یەکەمجار لەوێ دەست بە دابەشکردنی زەوی دەکەین."