وادەی دابەشکردنی مووچەی مانگەکانی هەشت و نۆ ڕاگەیێنرا

ئاڤا نیوز

 

وەزارەتی دارایی و ئابووریی هەرێمی کوردستان وادەی دابەشکردنی مووچەی مانگەکانی هەشت و نۆی ڕاگەیاند، هەینی دەست بە دابەشکردنی مووچەی مانگی هەشت دەکرێت و هەفتەی داهاتوو کۆتایی دێت، دواتر ڕاستەوخۆ دەست بە دابەشکردنی مووچەی مانگی نۆ دەکرێت. 

ڕاگەیێنراوی فەرمی: وەزارەتی دارایی و ئابووری ڕایگەیاند: ماوەی سێ ڕۆژە شاندێکی تەکنیکیمان کە پێکهاتووە لە ڕێباز عەباس، ڕاوێژکاری وەزارەت و کۆڤان تەحسین، بەڕێوەبەری گشتیی ژمێرکاری، بە هاوکاری فارس عیسا، بەرپرسی نوێنەرایەتیی حکومەتی هەرێم لە بەغدا و ئیخلاس دلێمی، جێگری سەرۆکی لیژنەی دارایی لە پەرلەمانی عێراق، بەمەبەستی تەواوکردنی ڕێکارەکانی ناردنی تەمویلی مووچەی مانگی ئەیلوول و چارەسەرکردنی ئاستەنگەکانی بەردەم ناردنی ئەو لێبڕینانەی لە مانگی دوو تا مانگی هەشت ڕاگیرابوون لە شاری بەغدان، لەو ماوەیەدا چەندین کۆبوونەوەیان لەگەڵ فەرمانگە  پەیوەندیدارەکانی وەزارەتی دارایی حکومەتی فیدراڵ کردووە و لەسەر چەند بابەتێک گەیشتوونەتە ڕێکەوتن.

ئەوەی پێویستە بیزانیت: ڕاگەیێنراوەکەی وەزارەتی دارایی و ئابووری چوار خاڵ لەخۆدەگرێت:

   
1-دوای تەواوکردنی سەرجەم ڕێکارەکانی ناردنی تەمویلی مووچەی مانگی ئەیلوول، ئێوارەی ڕۆژی چوارشەممە بڕی 598 ملیار دینار وەک تەمویلی مووچەی مانگی نۆی فەرمەنبەران و خانەنشینانی شارستانی و فەرمانبەرانی گرێبەست خرایە سەر هەژماری بانکی وەزارەتی دارایی و ئابووریی هەرێمی کوردستان.    

2- لەسەر بڕیاری ئاوات شێخ جەناب، وەزیری دارایی و ئابووری لەڕۆژی هەینی ( 2024/10/4 ) دەست بە دابەشکردنی مووچەی مانگی هەشت دەکرێت و لەماوەی چەند ڕۆژێکدا مووچەی سەرجەم فەرمانبەران و مووچەخۆران دابەش دەکرێت.   
 
3-ڕوونکردنەوە و زانیاریی پێویست لەسەر ئەو لێبڕینانەی لە مانگی دوو تا مانگی هەشت لە لیستی مووچەی فەرمانبەرانی هەرێم بە بیانووی جیاواز ڕاگیرابوون، بە داتا و زانیاریی دروست و نووسراوی فەرمی پێشکەش بە فەرمانگە پەیوەندیدارەکان لە وەزارەتی دارایی حکومەتی فیدراڵ کرا و،  بڕیارە هەفتەی داهاتوو سەرجەم ئەو لێبڕینانە خەرج بکرێت.  

4- دوای خەرجکردنی مووچەی مانگی نۆی هێزە ئەمنییەکان و سەرجەم ئەو لێبڕینانەی لە مووچەی مانگەکانی سەرەتای ئەمساڵ تا مانگی هەشت ڕاگیرابوون  لەلایەن وەزارەتی دارایی عێراق لە هەفتەی داهاتوودا، ڕاستەوخۆ دەست بە دابەشکردنی مووچەی مانگی نۆ دەکرێت. 

 

ئەمەش بزانە: تائێستا مووچەی مانگی نۆی هێزە ئەمنییەکان نەنێردراوە و بڕیارە هەفتەی داهاتوو بنێردرێت.