سەرۆکوەزیران مەسرور بارزانی: کاتی ئەم هەڵبژاردنە زۆر هەستیارە

ئاڤا نیوز

سەرۆکوەزیران مەسرور بارزانی ڕایدەگەیێنێت، ڕاستە هەموو هەڵبژاردنێک چارەنووسسازە، بەڵام کاتی ئەم هەڵبژاردنە زۆر هەستیارە. لە ماوەی ڕابردوودا فشارێکی زۆر هەبووە لەسەر کۆی ڕووداوەکان لە ڕۆژهەڵاتی ناوەڕاست و بەتایبەتی بەم دواییە لەسەر هەرێمی کوردستان. بۆیە زۆر گرنگە خەڵک کە بڕیاری خۆی دەدا، بیر لە داهاتووی قەوارەی هەرێمی کوردستان بکاتەوە.

وێنە گەورەکە: سەرۆکوەزیران مەسرور بارزانی لە چاوپێکەوتنێکی تایبەتدا لەگەڵ ئاڤا میدیا، بۆ یەکەمجار ڕاشکاوانە لەبارەی چەندین پرسی گرنگ دەدوێت، یەکێک لەوان هەڵبژاردنی خولی شەشەمی پەرلەمانی کوردستانە کە بڕیارە 20ی ئەم مانگە بکرێت.

لێدوانی فەرمی: سەرۆکوەزیران بارزانی لە وەڵامی پرسیارێکدا لەبارەی بۆچوونی خۆی لەبارەی هەڵبژاردن دەڵێت: "دەتوانم بڵێم ئێستا بۆچوونەکان لەسەر دوو بەرە دابەش بوون، بەرەیەک باسی ڕادەستکردن و خۆبەدەستەوەدان و نەهێشتن و تێکدان دەکات، بەرەیەکی دیکە باسی بەهێزترکردنی قەوارەی هەرێمی کوردستان و بەرەو پێشچوون و بەرەو ئاوەدانی دەکات. ئیتر لەسەر خەڵکی کوردستانە کە دەیەوێت داهاتووی ئەو قەوارەیە و داهاتووی ژیانی خۆیان چۆن بێت.. بۆیە پێموایە ڕاستە هەڵبژاردنێکی زۆر گرنگە، چاومان لەوەیە خەڵکی کوردستان بڕیاری کۆتایی خۆیان لەم هەڵبژاردنە بدەن".

 

لەلایەکی دیکەوە: لەبارەی گرنگی ئەم هەڵبژاردنە بۆ پارتی،  مەسرور بارزانی وەکو جێگری سەرۆکی پارتی وەڵام دەداتەوە و دەڵێت: "بێگومان، چونکە پارتی لە بەرەی ئاوەدانی و پێشکەوتن و بەهێزکردن و پاراستنی قەوارەی هەرێمی کوردستانە. بۆیە کە دەڵێم بەسەر دوو بەرەی جیا دابەش بووین، بەڵام بەپێچەوانەوە لایەنی دیکە هەبووە هەوڵی لاوازکردنی قەوارەی هەرێمی کوردستانی داوە. ئێستاش دەبێت خەڵکی کوردستان بڕیار بدات لەگەڵ کام بۆچوونە".