سەرۆکوەزیران بارزانی: دەتوانین لە دوو ساڵی داهاتوودا کارەبا بکەینە 24 کاتژمێری

ئاڤا نیوز

سەرۆکوەزیران مەسرور بارزانی لە چاوپێکەوتنێکی تایبەتدا لەگەڵ ئاڤا میدیا ڕایدەگەیێنێت، حکومەت دەتوانێت لە ماوەی دوو ساڵی داهاتوودا کارەبای 24 کاتژمێری بۆ سەرتاسەری هەرێمی کوردستان دابین بکات.

 

وێنە گەورەکە: کابینەی نۆیەمی حکومەتی هەرێمی کوردستان ملیاران دۆلاری بۆ سێکتەری کارەبا خەرج کردووە، بەرهەمهێنانی کارەبا هەزار و 340 مێگاوات زیادی کردووە و گەیشتووەتە سێ هەزار و 817 مێگاوات، هاوکات ژێرخانی بەرهەمهێنانی کارەبا لە هەرێمی کوردستان گەیشتووەتە حەوت هەزار و 689 مێگاوات.

 

لێدوانی فەرمی: مەسرور بارزانی، سەرۆکوەزیرانی هەرێمی کوردستان کاتێک دێتە سەر پلانی داهاتوویان بۆ زیاترکردنی خزمەتگوزارییەکان، لە کارەباوە دەستپێدەکات و دەڵێت، هەوڵێکی زۆریان داوە بۆ ئەوەی سەرچاوەی دروستکردنی وزە زیاد بکەن. لەمانە بابەتی غاز، سۆلەر ئێنێرجی، هەوا و ئاو، هەموو ئەو سەرچاوانە کە زیاد دەکرێن، دروستکردنی وزە زیاد دەکرێت، ئەمەش بەشێکە لەو بەرنامانەی کە حکومەت بەردەوام کاری لەسەر دەکات، بەڵام کاتی دەوێت.

چارەسەرەکان: سەرۆکوەزیران ئاماژە بە چاکسازیکردن و ڕێکخستنەوەی کەرتی کارەبا دەکات وەکو هەوڵێک بۆ دابینکردنی کارەبای 24 کاتژمێری و دەڵێت، هەنگاوی زۆر باش نراوە، زۆر لەو ژێرخانەی کە کارەبای تێدا بەهەدەر دەچوو گۆڕانکاریان بەسەردا هاتووە و چاکسازی تێدا کراوە.


ئەوەی پێشبینی دەکرێت: لە وەڵامی ئەو پرسیارەی کەی دەتوانرێت کارەبای 24 کاتژمێری دابینبکرێت؟ سەرۆکوەزیران دەڵێت: "ئەم تاقیکردنەوەیە ئێستا لە هەولێر دەستی پێکراوە، دوو گەڕەک کارەبای 24 کاتژمێریان هەیە کە پێموایە زۆریش ڕەزامەندن، حکومەت دەتوانێت کارەبای 24 کاتژمێری لەسەر ئاستی هەموو هەولێر ئینشەڵڵا لە ماوەیەکی نزیکدا و لەسەر ئاستی هەموو کوردستانیش لە ماوەی دوو ساڵی داهاتوودا ئەو کەرتە بەرەو پێشەوە ببات و کارەبای 24 کاتژمێریان بۆ دابین بکات".