هەژماری من ڕەزامەندی حکومەتی فیدراڵی وەردەگرێت

ئاڤا نیوز

 

وەزیری دارایی عێراق بە پەلەمانتارە کوردەکانی ئەنجوومەنی نوێنەرانی عێراقی گوتووە، لێکتێگەیشتن لە نێوان حکومەتی هەرێمی کوردستان و بانکی ناوەندی هەیە، کە هەژماری من وەکو بەشێک لە پڕۆسەی دروستکردنی هەژماری بانکی بۆ مووچەخۆران هەژمار بکرێت. 

 

وێنە گەورەکە: بەبانکیکردنی مووچەی مووچەخۆرانی هەرێمی کوردستان, یەكێکە لە تێبینییەکانی وەزارەتی دارایی عێراقە و داوایکردووە لە ماوەیەکی نزیکدا پڕۆسەکە تەواوبکرێت، تاوەکو کۆتایی ئەمساڵ یەک ملیۆن مووچەخۆر لە هەرێمی کوردستان دەبنە خاوەنی هەژماری بانکیی، لە کاتێکدا عێراق هەشت ساڵە ئەو بڕیارەی داوە و هێشتا جێبەجێنەکراوە. 

 

لێدوانی فەرمی: موسەننا ئەمین، ئەندامی پەرلەمانی عێراق بە ئاڤا نیوزی گوت: "تەیف سامی، وەزیری دارایی عێراق؛ پێی گوتین کە لێکتێگەیشتن لە نێوان حکومەتی هەرێمی کوردستان و بانکی ناوەندی عێراق سەبارەت بە هەژماری من هەیە، بۆئەوەی پڕۆسەی بە بانکیکردنی مووچەخۆرانی هەرێمی کوردستان تەواو بکرێت."

 

ئەوەی پێویستە بیزانیت: تاوەکو ئێستا نزیکەی 600 هەزار مووچەخۆر لە هەژماری من تۆمارکراون, زیاتر 200 هەزاریان دەتوانن مووچەکانیان لە ATMـەکان ڕابکێشن.