لە بەغداوە هاتووە و 20 کیس پاشماوەی لە گۆمی فێڵاو کۆکردووەتەوە

ئاڤا نیوز

 

بۆ گەشتێكی زستانە لە بەغداوە هاتووەتە گۆمی فێڵاو لە باڵەكایەتی، بەڵام دیمەنی كۆبوونەوەی پاشماوەی سەردانكەرانی پێش خۆی ئەوەندە نیگەرانی كرد، نەیتوانی هەمان دیمەن لەپاش خۆی بەجێبهێڵێت.

عەباس تەمەنی 25 ساڵە و عاشقی سرووشتە، سەرسامە بە جوانییەكانی سرووشتی كوردستان و هەركات دەرفەتی بۆ ڕەخسابێت لەگەڵ هاوڕێكانی لە خێمەیەكدا لە نێو سرووشتی ناوچە شاخاوییەكاندا رۆژی كردووەتەوە.

گەشتی ئەمجارەشی بۆ چێژ و خۆشی بوو، بەڵام لە سەرمای ژێر سفری باڵەكایەتیدا 15 رۆژ مایەوە و لەنێو ئاوە ساردەكەی گۆمەكەدا زیاتر لە 20 كیسی گەورە پاشماوەی سەیرانكەرانی كۆكردووەتەوە و سیمای جوانی سروشتی بۆ فێڵاو گەڕاندەوە.

گۆمی فێلاو یەكێكە لە بەنێوبانگترین گۆمەكانی هەرێمی كوردستان، سێ هەزار مەتر لە ئاستی رووی دەریا بەرزە، گۆمەكە دەكەوێتە  بەرامبەر چیای حەساری سەكران و نۆ كیلۆمەتر لە قەزای چۆمان و 130 كیلۆمەتر لە هەولێر دوورە و لە هەر چوار وەرزی ساڵدا گەشتیارێكی زۆر رووی تێدەكەن.