زیندانیانی سیاسیی مینحەی 20 مانگ بەیەکەوە وەردەگرن

ئاڤا نیوز 

 

دوای ئەوەی سەرۆكوەزیران مەسرور بارزانی بڕیاری دا دەست بە خەرجکردنی مینحەی زیندانیانی سیاسی بکرێتەوە، ئێستا دەست بە کۆکردنەوەی داتا و زانیاری کراوە، هاوکات مینحەی 20 مانگیان بەیەکەوە پێدەدرێت.

 

لێدوانی فەرمی: پێشتر د.ئومێد سەباح، سەرۆکی دیوانی ئەنجوومەنی وەزیرانی هەرێمی كوردستان بە ئاڤا نیوزی ڕاگەیاندبوو: "بابەتی هاوتاكردنی مووچەی زیندانیانی سیاسیی یەكێک بووە لەو بابەتانەی لە كۆبوونەوەی ئەنجوومەنی وەزاری عێراق بۆ ئابووری و ئەنجوومەنی ئابووریی هەرێمی کوردستان گفتوگۆی لەسەر كراوە".

 

زانیاریی تایبەت: وەزارەتی شەهیدان و ئەنفالکراوان، تێکڕای گوژمەی مینحەی ڕاگیراوی زیندانیانی سیاسیی ڕەوانەی دیوانی سەرۆکایەتیی ئەنجوومەنی وەزیران دەکات، بەمەبەستی گەڕانەوە و خەرجکردنی مووچەکانیان کە ماوەی نزیکەی دوو ساڵ ڕاگیرابوو، لە ڕێکەوتی 1-5-2021 تا 31-12-2022.

 

باکگراوند: بەپێی ئاماری بەڕێوەبەرایەتیی زیندانییە سیاسییەكانی سەر بە وەزارەتی كاروباری شەهیدان و ئەنفالکراوان، زیاتر لە 20 هەزار زیندانی سیاسیی لە هەرێمی كوردستان هەن، ئەو کەسانەی مینحەیان ڕاگیرابوو زۆرینەیان دانیشتووی هەڵەبجە و ئیداری گەرمیانن.