ڕێباز حەملان: داهاتی خۆجێیی سلێمانی 100% لەدەستی یەکێتییە

ئاڤا نیوز

ڕێباز حەملان، یاریدەدەری سەرۆکوەزیران مەسرور بارزانی دەڵێت: "داهاتی خۆجێیی سلێمانی 100% بەدەستی یەکێتییەوەیە، بەڵام هیچ دەسکەوتێکیان نییە بە خەڵکی بڵێن، بۆیە پەلاماری دەسکەوتەکانی پارتی دەدەن."

وێنە گەورەکە: تا کۆتایی ساڵی 2014، ئەو بودجەیەی لە عێراق بۆ هەرێمی کوردستان هاتووە 43%ـی بۆ ناوچەکانی ژێر دەسەڵاتی یەکێتی و 57%ـی بۆ ناوچەکانی ژێر دەسەڵاتی پارتی بووە،  لە ئەنجوومەنی باڵای نەوت و گازیش یەکێتی بەشداربووە و داهاتی نەوتیش بەسەر سەرجەم ناوچەکاندا دابەش کراوە، ئێستاش داهاتی ناوخۆی ناوچەکانی ژێر دەسەڵاتی یەكێتی وەک داهاتەکانی "گومرگ، باج و ڕسومات" هەمووی دەگەڕێتەوە خەزێنەی بانکی هەرێم لە سلێمانی.

 

لێدوانی فەرمی: ڕێباز حەملان، یاریدەدەری سەرۆکوەزیرانی هەرێمی کوردستان بۆ کاروباری دارایی و ئابووری، لە گەشتی هەواڵەکانی کاتژمێر 07:00ـی ئاڤا کە هەوراز گوڵپی پێشکەشی دەکات ڕایگەیاند، "داهاتی خۆجێیی لە سلێمانی 100% بەدەستی یەکێتییەوەیە، بەڵام هیچ دەسکەوتێکیان نییە بە خەڵکی بڵێن، بۆیە پەلاماری دەسکەوتەکانی پارتی دەدەن."

 

زانیاریی زیاتر: لە بەشێکی دیکەی گوتەکانیدا یاریدەدەری سەرۆکوەزیران ئاماژەی بەوەدا، هەر کەموکوڕییەک لە سلێمانی، هەڵەبجە، ڕاپەرین و گەرمیان هەبێت یەکێتی لێی بەرپرسە، چونکە لەو سنوورە پارتی بەرپرسی بەشێکیشی نییە.