تاوانبارێکی مەترسیدار لە زیندانێکی بەسرە هەڵدێت

ئاڤا نیوز

 

لە زیندانی بنکەیەکی پۆلیسی پارێزگای بەسرە، بکوژێکی مەترسیدار ڕایکرد؛ ئەو تاوانبارە بە فەرمانی دادوەر چووەتە نەخۆشخانە و دوای وەرگرتنی چارەسەر، هەڵهاتووە.

 

چیرۆکی سەرەکی: ئەحمەد عەبدولواحید شایع، تاوانبار بووە و لە زیندانەکەی خۆی لە بنکەی پۆلیسی کۆماریی دیار نامێنێت، دوای بەدواداچوون دەردەکەوێت بە فەرمانی ئەفسەرێکی پۆلیس، ڕەوانەی نەخۆشخانەی موسەیی کراوە. دوای گەیشتنی پۆلیس بۆ نەخۆشخانە، تاوانبار و ئەفسەرەکە لە نەخۆشخانە نەماون و مۆبایلی ئەفسەرەکەش داخراوە. 

 

چی ڕوویدا؟ لە شوباتی 2023، ئەحمەد عەبدولواحید شایع، یەکێک لە "مەترسیدارترین قاچاخچی و داواکراوەکانی لە عێراق" دەستگیرکرا؛ لەسەر زیاتر لە دۆسیەیەک یادداشتی دەستگیرکردنی بۆ دەرچوو کە پەیوەست بوون بە ئاسایشی دەوڵەت، تیرۆر و کوشتن.

 

ڕاگەیێنراوی فەرمی: سەرچاوە ئەمنییەکان ڕایانگەیاندبوو: "شایع، تۆمەتباری سەرەکیی کوشتنی بەڕێوبەری کۆمپانیای دایۆی کۆری بووە کە پێش سێ ساڵ لە بەسرە تەرمەکەی دۆزرایەوە"؛ وەزارەتی ناوخۆی عێراق رایگەیاند: "ئەو تاوانبارە هەڵهاتووە، پەیوەندی بە ڕووداوی کوشتنی بەڕێوبەری کۆمپانیا کۆرییەکەوە نییە و بەپێی مادەی 412 لە یاسای سزادانی عێراقی، بۆ ماوەی دوو ساڵ سزادراوە".