لە بانگەشەی هەڵبژاردن 30 سکاڵا تۆمارکراون

ئاڤا نیوز

بەراورد بە سێ ڕۆژی یەکەمی دەستپێکردنی بانگەشەی هەڵبژاردن، ژمارەی سکاڵاکان دوو ئەوەندە و نیو زیادی کردووە. تاوەکو ئێستا 30 سکاڵا تۆمارکراون و 15یان تەنیا لە بازنەی سلێمانین.

وێنە گەورەکە: کۆمیسیۆنی هەڵبژاردنەکانی عێراق 15 ڕێنمایی پەیوەست بە بانگەشەی هەڵبژاردن بڵاوکردووەتەوە، هەر لایەنێک سەرپێچی ئەو ڕێنماییانە بکات، سزای دارایی دەدرێت لەو بڕەی کە وەک دڵنیایی (تەئمینات) لەلای کۆمیسیۆن دانراوە، تاوەکو دوورخستنەوەی ئەو لایەنەی کە سەرپێچیکارە.

لێدوانی فەرمی: جومانە غەلای، گوتەبێژی کۆمیسیۆنی هەڵبژاردنەکانی عێراق بە ئاڤا نیوزی گوت: "لە ماوەی دوو هەفتەی دەستپێکردنی بانگەشەدا 15 سکاڵا لە بازنەی سلێمانی، 11 سکاڵا لە بازنەی هەولێر و سێ سکاڵا لە بازنەی دهۆک لەلایەن لایەنەکانەوە تۆمارکراون، سکاڵایەکیش لەلایەن بەربژێرێکی سەربەخۆ تۆمارکراوە."

ئەوەی پێویستە بیزانیت: بانگەشەی هەڵبژاردن هەفتەیەکی ماوە و 12 ڕۆژی دیکە دەنگدانی گشتیی بۆ خولی شەشەمی پەرلەمانی کوردستان دەکرێت، هەزار و 191 بەربژێر کێبڕکێ لەسەر بەدەستهێنانی 100 کورسی دەکەن.