ئیمارات گەشتەکانی بۆ چەند شارێکی عێراق و ئێران ڕادەگرێت

ئاڤا نیوز

هێڵی گەشتیاری ئیمارات بڕیاری دا تا 16ی ئەم مانگە هەموو گەشتەکانی بۆ چەند شارێکی عێراق و ئێران ڕابگرێت، بڕیارەکە باس لە شارەکانی بەغدا و بەسرە و تاران دەکات، بەوپێیەش گەشتەکانی ئەو وڵاتە بۆ فڕۆکەخانەکانی هەرێمی کوردستان بەردەوام دەبن.

وێنە گەورەکە: لەدوای هێرشە مووشەکییەکەی 1ی ئەم مانگەی ئێران بۆ سەر ئیسرائیل، هاوکات بەهۆی هێرشی گرووپەکانی بەرەی مقاوەمە لە عێراقەوە بۆ سەر ئیسرائیل، ئێستا چاوەکان لەسەر وەڵامدانەوەی ئیسرائیلن و ئەو وڵاتەش هەڕەشەی تووندی کردووە، بەوهۆیەش گەشتە ئاسمانییەکان لەڕێگەی ئاسمانی عێراق و ئێران کەمتربوونەتەوە.

ڕاگەیێنراوی فەرمی: هێڵی گەشتیاری ئیمارات بڵاویکردەوە، بەڕەچاوکردنی دۆخی ناوچەکە، بڕیار دراوە تاوەکو 16ی ئەم مانگە هەموو ئەو گەشتانەی خاڵی دەستپێک و کۆتاییان بەغدا و بەسرە و تارانە هەڵدەوەشێنێتەوە، هاوکات ڕێگەش بەگەشتی ترانزێت لە دوبەیەوە بۆ ئەو سێ شارە نادرێت.

زانیاریی زیاتر: هێڵی گەشتیاری ئیمارات داوا لەو گەشتیارانە دەکات کە بەهۆی بڕیارەکەوە ڕووبەڕووی ئاستەنگ دەبنەوە، پەیوەندی بە هێڵە گەشتیارەکانەوە بکەن تا ڕێکاری جێگرەوەیان بۆ پێشنیاز بکرێت، یان پەیوەندی بە هێڵی ئیماراتەوە بکەن ئەگەر لەو هێڵە بلیتی گەشتیان هەیە.

ئەوەی پێویستە بیزانیت: پەیوەست بە عێراق لە بڕیارەکەدا تەنها فڕۆکەخانەی نێودەوڵەتی بەغدا و بەسرە ناویان هێنراوە، بەوپێیەش گەشتەکان بۆ فڕۆکەخانەی نێودەوڵەتیی هەولێر و سلێمانی و فڕۆکەخانەکانی کەرکووک و نەجەف بەردەوام دەبن.