کۆمیسیۆن بڕیارێکی نوێ لەبارەی هەڵبژاردن دەردەکات

ئاڤا نیوز

 

کۆمیسیۆنی باڵای سەربەخۆی هەڵبژاردنەکانی عێراق بڕیارێکی نوێ لەبارەی وەرگرتنەوەی کارتی دەنگدان دەردەکات و وادەکەی کەم دەکاتەوە، بەپێی بڕیارە نوێیەکە تەنیا سێ ڕۆژ کات لەبەردەم ئەو دەنگدەرانە ماوە کە کارتیان وەرنەگرتووەتەوە.

 

وێنە گەورەکە: بەگوێرەی ڕێنمایی کۆمیسیۆنی هەڵبژاردنەکانی عێراق، هەر دەنگدەرێک لە ڕۆژی هەڵبژاردن کارتی بایۆمەتری دەنگدانی پێنەبێت، ناتوانێت لە خولی شەشەمی پەرلەمانی کوردستان دەنگ بدات، تاوەکو ئێستا 120 هەزار و 717 دەنگدەر هێشتان کارتەکانیان وەرنەگرتووەتەوە، ئەگەر لەماوەی 72 کاتژمێری داهاتوو وەرینەگرنەوە بێبەش دەبن لە دەنگدان.

 

ئەوەی پێویستە بیزانیت: پێشتر مەڕوان محەممەد نەجاڕ، بەڕێوەبەری ئۆفیسی هەولێری کۆمیسیۆنی  بە ئاڤا نیوزی گوتبوو: "پڕۆسەی وەرگرتنەوەی کارتی دەنگدان لە سەرجەم بنکەکانی کۆمیسیۆن تاوەکو ڕۆژی هەڵبژاردن بەردەوام دەبێت، بەجۆرێک ڕۆژی 20-10-2024  کە ڕۆژی دەنگدانە، دەنگدەران دەتوانن کارتەکەیان وەربگرنەوە و دەنگ بدەن". بەڵام ئەمڕۆ لە لێدوانێکدا گوتی بڕیاری نوێ دەرکراوە و وادەکە هێنراوەتە پێش.

 

لێدوانی فەرمی: د. عیماد جەمیل، سەرۆکی تیمی ڕاگەیاندنی ئەنجوومەنی کۆمیسیاران بە ئاڤا نیوزی ڕاگەیاند، "ڕۆژی 15-10-2024 کاتژمێر 3ـی دوانیوەڕۆ وەرگرتنەوەی کارتەکانی بایۆمەتری دەنگدان دەوەستێت، ئەو کارتانەی دەمێننەوە تاوەکو دوای پڕۆسەی هەڵبژاردن لەشوێنێکی پارێزراودا هەڵدەگیرێن، بۆ ئەوەی هەوڵ بۆ هیچ پێشێلکارییەک نەدرێت."

 

ژمارەکان وادەڵێن: بەگوێرەی دوایین ئاماری کۆمیسیۆنی سەربەخۆی هەڵبژاردنەکانی عێراق ژمارەی ئەو دەنگدەرانەی کارتی دەنگدانیان وەرنەگرتووەتەوە بەمشێوەیە:-

هەولێر: لە کۆی یەک ملیۆن و 15 هەزار و 667 دەنگدەر، 29 هەزار و 935 دەنگدەر کارتەکانیان وەرنەگرتووەتەوە.

سلێمانی و هەڵەبجە: لە کۆی یەک ملیۆن و 146 هەزار و 92 دەنگدەر، 77  هەزار و 238 کەس کارتی بایۆمەتری دەنگدانیان وەرنەگرتووەتەوە.

دهۆک: لەکۆی 737 هەزار و 856 دەنگدەر، 13 هەزار و 544 کەس کارتی بایۆمەتری دەنگدانیان وەرنەگرتووتەوە.