ترەمپ: ئەو کۆچبەرانەی ئەمریکییەکان دەکوژن دەبێت لەسێدارە بدرێن

ئاڤا نیوز

 

دۆناڵد ترەمپ، کاندیدی کۆمارییەکان بۆ پۆستی سەرۆکایەتیی ئەمریکا داوای سزای لەسێدارەدان بۆ ئەو کۆچبەرانە دەکات کە دەبنە هۆی کوژرانی ئەمریکییەکان.

 

وێنە گەورەکە: ترەمپ لە گردبوونەوەیەکی جەماوەریدا لە ویلایەتی کۆلۆرادۆ، کۆچبەرانی وەک "تاوانباری مەترسیدار" پێناسە کرد، کە بوونەتە هۆی "مەترسی بۆ سەر ژیانی ئەمریکییەکان".

 

لێدوانی فەرمی: دۆناڵد ترەمپ ڕایگەیاند ''من لێرەوە داوای سزای لەسێدارەدان بۆ هەر کۆچبەرێک دەکەم کە هاووڵاتییەکی ئەمریکی یان ئەفسەرێکی جێبەجێکاری یاسا بکوژێت''.

 
هۆکارە زانراوەکان: چەند ڕاپرسییەک ئەوە دەردەخەن، کە ترەمپ لەلایەن زۆربەی دەنگدەرانەوە وەک ئەو کەسە سەیر دەکرێت توانای چارەسەرکردنی کێشەی کۆچبەرانی لە ئەمریکا هەیە، هەربۆیەش بە شێوەیەکی بەرچاو قسەکانی دژە کۆچبەری توندتر کردووە.