سەرۆکی هەرێمی کوردستان دوو فەرمانی هەرێمیی دەرکرد

ئاڤا نیوز

 

سەرۆکی هەرێمی کوردستان لێبووردنی تایبەت بۆ 17 سزادراو و بەقەزاکردنی تەقتەق دەردەکات. 

 

وێنە گەورەکە: بەپێی بڕگەی 6 لە ماددەی دەیەم لە یاسای سەرۆکایەتیی هەرێمی کوردستان - عێراق ژمارە 1ـی ساڵی 2005 هەموارکراو، ڕۆژی یەکشەممە 13-10-2024 نێچیرڤان بارزانی، سەرۆکی هەرێمی کوردستان، فەرمانی ژمارە 336 دەرکرد کە لێبووردنێکی تایبەتە بۆ ژمارەیەک لە حوکمدراوانی چاکسازییەکانی هەرێمی کوردستان لە چوارچێوەی پرۆسەیەکی لێبوردندا کە بەردەوامی دەبێت.

 

لێدوانی فەرمی: دڵشاد شەهاب، گوتەبێژی سەرۆکایەتیی هەرێمی کوردستان ڕایگەیاند: بەپێی ئەو فەرمانە 17 حوکمدراو کە بەشی زۆری ماوەی حوکمەکەیان تەواو کردووە و دۆخی تەندروستییان ناجێگیرە، لێبووردنە تایبەتییەکەی سەرۆکی هەرێمی کوردستان، دەیانگرێتەوە.

 

ئەوەی پێویستە بیزانیت: ئەو فەرمانە دەرئەنجامی ڕاسپاردەیەکی پێشتری سەرۆکی هەرێمی کوردستانە بە پێکهێنانی لیژنەیەکی هاوبەشی نێوان سەرۆکایەتیی هەرێمی کوردستان و سەرۆکایەتیی ئەنجوومەنی وەزیران و وەزارەتە پەیوەندیدارەکان و ئەنجوومەنی دادوەری، هاوکات دەستەی مافی مرۆڤ لە هەرێمی کوردستان بۆ هەڵسەنگاندنی دۆخی بەندیخانە و چاکسازییەکان بووە.

 

زانیاریی زیاتر: لیژنەکە لە ماوەی ڕابردوودا لە دۆخی ئەو حوکمدراوانەی کۆڵیوەتەوە کە سەرباری تەواوکردنی ماوەیەکی زۆری حوکمەکەیان، مەترسییان نەماوە و دەتوانن تێکەڵی کۆمەڵگە ببنەوە، بۆیە پێشنیازی ئازادکردنی کردوون.

 

گۆشەیکەی دیکەی دیمەنەکە: پاش ئەوەی هێنانەکایەی قەزای تەقتەق لە سەرۆکایەتیی ئەنجوومەنی وەزیرانەوە پێشنیاز کرا و ڕەوانەی سەرۆکایەتیی هەرێمی کوردستان کرا، نێچیرڤان بارزانی فەرمانی هەرێمی بۆ دەرکرد.