جێگری پارێزگاری کەرکووک هەڵبژێردرا و بەرەی تورکمانی ناڕازییە

ئاڤا نیوز

 

بەرەی تورکمانی عێراق هەڵوێستی ناڕەزایەتیی دژی دانانی کەسایەتییەکی دوور لە ویستی بەرەکەیان بۆ جێگیری پارێزگاریی کەرکووک ڕادەگەیەنێت. 

 

وێنە گەورەکە: پاش دوو مانگ لە پێکهێنانی حکومەتی خۆجێیی کەرکووک بەبێ بەشداریی پارتی، بەرەی تورکمانی و چەند لایەنێکی دیکەی عەرەبی، ئەمڕۆ دووشەممە 14-10-2024، جێگری پارێزگاری کەرکووک هەڵبژێردراو و بەرەی توركمانیش ڕەتی دەکاتەوە.

 

لێدوانی فەرمی: قەحتان وەنداوی، بەرپرسی لقی کەرکووکی بەرەی تورکمانی بە ئاڤا نیوزی ڕاگەیاند: "ئەو کەسەی بووەتە جێگری پارێزگاری کەرکووک، کاندیدی بەرەی تورکمانی نەبووە و نوێنەرایەتیی تورکمانەکان ناکات، بۆیە ئێمە نیگەرانین لەو هەڵوێستە، هاوکات ئەم کارە دۆخی ئیداریی پارێزگاکە تێکدەدات".

 

زانیاریی زیاتر: بەرپرسی لقی کەرکووکی بەرەی تورکمانی ئەوەشی خستەڕوو: سکاڵایان لە دادگەی فیدڕاڵی تۆمار کردووە و هیچ دانیشتنێک لە پارێزگاکە ناکەن تاوەکو دادگە کەیسەکە یەکلایی دەکاتەوە و تەنیا بەرەی تورکمانی دەتوانێت کاندید بۆ ئەو پۆستە ئامادە بکات، هاوکات دوای دەرچوونی بڕیارەکە دوایین هەڵوێستی خۆیان لەسەر بابەتەکە ڕادەگەیێننن.

 

زانیاریی پەیامنێر: ڕۆکان جاف، پەیامنێری ئاڤا نیوز لە کەرکووک ڕایگەیاند: "ئەم کاندیدەی ئەمڕۆ لە ئەنجوومەنی پارێزگای کەرکووک وەک جێگری پارێزگار دەستنیشانکرا، لە باڵی ئەرشەد ساڵحییە کە کێشەی لەگەڵ بەرەی تورکمانی لە کەرکووک هەیە، هاوکات لە کۆبوونەوەکەدا قایمقامی قەزاکانی حەویجە و داقووق و دبز، بە لایەنی عەرەبی دراوە و پێش شازدەی ئۆکتۆبەر قایمقامی داقووق بۆ کورد و پشکی پارتی بووە، ڕێککەوتنی یەکێتی و هاوپەیمانی عەرەبی وایکردووە قایمقامی داقووق بە لایەنی عەرەبی بدرێت".